"Fitch" qlobal iqtisadi artım proqnozunu azaltdı
Beynəlxalq kredit reytinqi agentliyi "Fitch Ratings" ABŞ-İran müharibəsinin alovlandırdığı neft böhranının qlobal iqtisadi artım perspektivlərinə mənfi təsir göstərdiyini əsas gətirərək, dünya iqtisadiyyatı üçün artım gözləntisini bu il üzrə 2,6 faizdən 2,4 faizə endirib.
AFN.az xəbər verir ki, agentlik Qlobal İqtisadi Perspektiv Hesabatının iyun buraxılışını "Neft Qiymətlərindəki Şok Qlobal Artım Gözləntilərinə Zərbə Vurdu" başlığı ilə dərc edib.
Hesabatda ABŞ-İran müharibəsinin tətiklədiyi neft böhranının qlobal artım perspektivlərinə mənfi təsir etdiyi, artan neft qiymətləri səbəbindən bu ilə dair qlobal iqtisadi artım proqnozunun 0,2 bənd azaldılaraq 2,4 faizə endirildiyi, dünya iqtisadiyyatının gələn il isə 2,5 faiz artacağı gözlənildiyi qeyd olunub.
Sənəddə yüksək inflyasiyanın real əməkhaqlarını azaltması, istehlakı tormozlaması və şirkətlərin xərclərini artırması səbəbindən proqnozlarda ümumi bir azalma yaşandığı bildirilib.
"Fitch"in hesabatında süni intellektlə bağlı investisiyalarda gözləniləndən daha güclü dinamikanın neft şokunun qlobal iqtisadi fəallığa təsirini yumşaltdığı, bu vəziyyətin dünya ticarətini və Asiyanın ixracını dəstəklədiyi ifadə edilib.
ABŞ və Avrozonanın iqtisadi artım proqnozlarında aşağı yönlü düzəlişlər edilərək, ABŞ-nin bu il üçün artım proqnozu 0,3 bənd azaldılaraq 1,9 faizə endirilib və ölkə iqtisadiyyatının gələn il də 1,9 faiz artacağı proqnozlaşdırılıb.
Hesabatda Avrozona iqtisadiyyatının bu ilə dair artım proqnozu da 0,4 bənd azaldılaraq 0,9 faizə çəkilib və gələn il region iqtisadiyyatının 1,1 faiz böyüməsi hədəflənib.
Çin iqtisadiyyatının bu ilə aid artım proqnozu isə 0,3 bənd artırılaraq 4,6 faizə yüksəldilib və ölkə iqtisadiyyatının gələn il 4,3 faiz böyüməsi gözlənilir.
"Brent" markalı neftin orta qiymətinə dair proqnoz bu il üçün bir barrelə görə 70 dollardan 87 dollara qaldırılıb.
Hesabatda neft şokunun qlobal artım üçün güclü bir maneə yaratdığı, lakin baza ssenarinin 1970-ci illərdəki dağıdıcı neft şokları ilə müqayisədə daha az şiddətli olduğu vurğulanıb, həmçinin real neft qiymətlərinin 1979-cu ildə bir barrel üçün 170 dollara çatdığı xatırladılaraq neft istehlakının dünya iqtisadiyyatındakı payının 1980-ci ildən bəri yarıbayarı azaldığı qeyd edilib.
Neft şokunun inflyasiya effekti qlobal pul-kredit siyasəti mənzərəsinə də təsir edib və pandemiyadan sonrakı inflyasiya təcrübəsi hələ təzə ikən mərkəzi bankların qiymət şokunun qalıcı fəsadlar törədə biləcəyindən narahat olduğu diqqətə çatdırılıb.
Hesabatda uçot dərəcələrinin 2021-ci illə müqayisədə çox daha yüksək, əmək bazarı şərtləri ilə maaş təzyiqlərinin daha zəif və fiskal siyasətin daha az genişləndirici olduğu izah edilib.
ABŞ Federal Ehtiyat Sistemi (FED) və İngiltərə Mərkəzi Bankının (BoE) faizləri bu il sabit saxlaması və 2027-ci ildə yenidən azaltmağa başlaması gözlənilir, Avropa Mərkəzi Bankının (ECB) isə iyun ayında faizləri 25 bazis bəndi artıracağı, lakin bu artımın gələn il geri alınacağı təxmin edilir.
