Dünya Bankı: Qlobal iqtisadi artım 2008-dən bəri ən aşağı səviyyəyə düşəcək
Qlobal iqtisadi artım 2008-ci ildən bəri ən aşağı səviyyəyə enəcək – Dünya Bankı
AFN.az xəbər verir ki, artan ticarət gərginliyi və siyasət qeyri-müəyyənliyi səbəbindən qlobal iqtisadi artımın bu il 2008-ci ildən bəri ən yavaş tempinə düşəcəyi gözlənilir.
Bu barədə Dünya Bankının Qlobal İqtisadi Perspektivlər Hesabatının iyun buraxılışında bildirilib.
Hesabatda qeyd olunub ki, bütün regionlar və gəlir qrupları üzrə iqtisadiyyatların təxminən 70 faizində artım proqnozları aşağı salınıb.
Bildirilir ki, qlobal iqtisadi artımın 2025-ci ildə 2,3 faizədək azalacağı gözlənilir ki, bu da ilin əvvəlində proqnozlaşdırılan səviyyədən təxminən yarım faiz bəndi aşağıdır.
Bankın proqnozlarına görə, dünya iqtisadiyyatının gələn il 2,4 faiz, 2027-ci ildə isə 2,6 faiz artacağı gözlənilir.
Dünya Bankı yanvar ayı təxminlərində qlobal iqtisadiyyatın bu il və gələn il 2,7 faiz artacağını proqnozlaşdırmışdı.
Hesabatda qlobal tənəzzülün gözlənilmədiyi, lakin qarşıdakı iki il üçün proqnozlar özünü doğrultduğu təqdirdə dünya iqtisadiyyatının 2020-ci illərin ilk yeddi ilində 1960-cı illərdən bəri onilliklərin əvvəlinə nisbətən daha yavaş artacağı bildirilib.
Bankın analitikləri bu il bütün inkişaf etməkdə olan iqtisadiyyatların təxminən 60 faizində iqtisadi artımın yavaşlaması gözlənildiyi, 2025-ci ildə orta hesabla 3,8 faiz, 2026 və 2027-ci illərdə isə orta hesabla 3,9 faizə yüksəlməsi gözlənildiyi qənaətindədirlər.
İnkişaf etmiş iqtisadiyyatların bu il 1,2 faiz, gələn il 1,4 faiz, 2027-ci ildə isə 1,5 faiz artacağı gözlənilir.
Bankın hesabatında qeyd edilib ki, artımın yavaşlaması inkişaf etməkdə olan iqtisadiyyatların məşğulluq yaratmaq, ifrat yoxsulluğu azaltmaq və inkişaf etmiş iqtisadiyyatlarla adambaşına düşən gəlir fərqini aradan qaldırmaq səylərinə mane olacaq.
Gömrük tariflərindəki artımların və sərt əmək bazarlarının qlobal inflyasiya üzərində yuxarı təzyiq yaratdığına diqqət çəkilən hesabatda, 2025-ci ildə orta hesabla 2,9 faiz olacağı gözlənilən qlobal inflyasiyanın hələ də pandemiyadan əvvəlki səviyyələrin üzərində qaldığı qeyd edilib.
Ölkələrin artım təxminlərinin də yer aldığı hesabatda, ABŞ iqtisadiyyatının bu il üçün artım gözləntisinin 2,3 faizdən 1,4 faizə, gələn il üçün proqnozun isə 2 faizdən 1,6 faizə endirildiyi bildirilib. 2027-ci ildə ölkə iqtisadiyyatının 1,9 faiz artacağı gözlənilir.
Hesabatda Avrozona iqtisadiyyatı üçün artım gözləntisinin bu il 1 faizdən 0,7 faizə, gələn il isə 1,2 faizdən 0,8 faizə endirildiyi bildirilir. Bildirilib ki, Avrozona iqtisadiyyatının 2027-ci ildə 1 faiz böyüməsi gözlənilir.
Çin iqtisadiyyatı üzrə artım təxminlərində heç bir dəyişiklik edilməyib. Ölkə iqtisadiyyatının bu il 4,5 faiz, gələn il 4 faiz, 2027-ci ildə isə 3,9 faiz böyüməsinin gözlənildiyi qeyd edilib.
