Mərakeş Seuta yaxınlığında polisi yüksək hazırlıq vəziyyətinə gətirib
Mərakeşin Aralıq dənizi sahilində yerləşən Seuta muxtar şəhəri yaxınlığındakı təhlükəsizlik qüvvələri və polis bölmələri sərhədi kütləvi şəkildə keçmək cəhdləri ilə bağlı çağırışlar fonunda yüksək hazırlıq rejiminə keçirilib.
AFN.az xəbər verir ki, bu barədə "The Maghreb Times" xəbər portalı məlumat yayıb.
Yerli hüquq-mühafizə orqanlarındakı mənbələrin verdiyi məlumata görə, Seutadan təxminən 5 kilometr məsafədə yerləşən Fnidek şəhərində və onun ətrafında gücləndirilmiş təhlükəsizlik rejimi elan olunub. Mənbələr bildirib ki, bu tədbirlər sosial şəbəkələrdə avqustun 15-nə planlaşdırılan yeni kütləvi qanunsuz sərhəd keçidinə hazırlıqla bağlı çağırışların yayılmasından sonra görülüb.
Təhlükəsizlik xidmətlərindən bildirilib ki, polisə qanunsuz miqrasiyaya təhrik edən və ya insan alverilə məşğul olan cinayətkar şəbəkələrlə əlaqəsi olan hər bir şəxsin əməllərinin qətiyyətlə qarşısının alınması barədə tapşırıq verilib. Bundan əlavə, sahil zolağı və sərhədyanı rayonlara aparan yollar boyunca nəzarət gücləndirilib. Mərakeş hakimiyyəti əlavə edib ki, bu addımlar insan həyatının qorunmasına, ictimai qaydanın saxlanılmasına və gənclərin qanunsuz miqrasiya şəbəkələri tərəfindən istismarına qarşı mübarizəyə yönəlib.
Daha əvvəl sosial şəbəkələrdə yeni miqrant dalğasına və Seuta sərhədini böyük qruplarla eyni vaxtda keçməyə dair anonim çağırışlar yayılmışdı. Mərakeş hakimiyyəti bu cür çağırışların təbliğinin və qanunsuz miqrasiyaya təhrikin krallığın qanunvericiliyinə əsasən cinayət məsuliyyəti yaratdığı barədə xəbərdarlıq edib.
