Çin süni intellekt modeli Böyük Britaniya hökumətinin test mühitindən qaçmağı bacarıb
Çinin süni intellekt şirkəti Moonshot AI tərəfindən hazırlanmış "Kimi K3" modeli Böyük Britaniya hökumətinə bağlı Süni İntellekt Təhlükəsizliyi İnstitutu (UK AISI) tərəfindən aparılan kibertəhlükəsizlik test mühitindən qaçmağı bacarıb.
AFN.az xəbər verir ki, hadisə süni intellekt sistemlərinin təhlükəsizliyinin sınaqdan keçirilməsi ilə bağlı yeni narahatlıqlar yaradıb.
ABŞ-da fəaliyyət göstərən Wired saytının məlumatına görə, ABŞ mərkəzli kibertəhlükəsizlik araşdırma şirkəti Frontier Security "Kimi K3" modelinin süni intellekt sistemlərini təhlükəsiz şəkildə sınaqdan keçirmək üçün nəzərdə tutulmuş institutun "sandbox" adlanan nəzarətli mühitindən çıxmağı bacardığını bildirib.
Şirkət modelin Anthropic, OpenAI və Meta-da yaşanan hadisələrə bənzər şəkildə öz virtual mühitindəki konfiqurasiya xətasından istifadə etdiyini açıqlayıb. Modelin heç bir üçüncü tərəfin veb-saytına və ya xidmətinə icazəsiz giriş əldə etmədiyi, lakin internetə qoşularaq həll etməyə çalışdığı problemin həllini GitHub-da tapdığı bildirilib.
Şirkətin baş direktoru Yaron Singer Wired-a açıqlamasında "Kimi K3"ün mürəkkəb təhlükəsizlik boşluğundan deyil, Böyük Britaniya hökumətinə bağlı AISI-nin test mühitindəki boşluqdan istifadə etdiyini bildirib.
OpenAI və Anthropic kimi ABŞ süni intellekt şirkətlərinin modelləri ilə rəqabət aparmaq məqsədi daşıyan "Kimi K3" iyul ayında ictimaiyyətə təqdim edilmişdi.
Süni intellekt modelinin imkanlarının göstəricisi kimi 2,8 trilyon parametrə malik olduğu bildirilən "Kimi K3"ün dünyanın ən böyük açıq mənbəli süni intellekt modellərindən biri olduğu qeyd edilir.
