Venesuelada narkotik qaçaqmalçılığı ilə bağlı gizli uçuş zolağı dağıdıldı
Venesuela beynəlxalq narkotik qaçaqmalçılığı ilə əlaqəli olduğu iddia edilən gizli bir uçuş zolağının məhv edildiyini elan edib.
Venesuela mərkəzli Telesurun xəbərinə görə, Bolivarçı Milli Polis Təşkilatının (PNB) açıqlamasında bildirilib ki, ölkənin Falcon əyalətinin kənd bölgəsində keçirilən əməliyyatda beynəlxalq narkotik qaçaqmalçılığı ilə əlaqəli olduğu iddia edilən və təyyarələrin qalxıb-enməsini təmin edən bir uçuş zolağı istifadəsiz hala gətirilib.
Uçuş zolağının təxminən 500 metr uzunluğunda olduğu vurğulanan açıqlamada bölgədə narkotik kartellərinə qarşı əməliyyatların qətiyyətlə davam etdiriləcəyi qeyd olunub.
Bu arada Müdafiə naziri Vladimir Padrino Lopez dövlət televiziyasına açıqlamasında ölkəsinin Karib bölgəsindəki hərbi varlığını gücləndirəcəyini söyləyib.
Lopez Venesuelanın Kariblər cəbhəsi və Atlantik cəbhəsi kimi tanınan 5 əyalətdəki hərbi varlığının xüsusi olaraq gücləndiriləcəyini bildirərək, Prezident Nikolas Maduronun göstərişi ilə hərəkətə keçdiklərini vurğulayıb.
Lopez narkotik kartellərinə qarşı əməliyyatların Kolumbiya sərhədindəki Apure əyalətində davam etdiyini xatırladaraq, “Heç kim bizim yerimizə bu işi görməyə gəlməyəcək. Heç kim bu torpaqlara ayaq basıb bizim etməli olduğumuz işi görməyəcək,” – deyə xəbərdarlıq edib.
Venesuela Vitse-prezidenti Delsi Rodriges də ABŞ-ın Karib dənizindəki hərbi varlığına dair açıqlamasında “Biz Venesuelaya yönəlik ciddi təhdidlərin olduğunu bilirik, ölkəmizə qarşı hücumların olduğunu bilirik. Lakin Venesueladakı istehsal prosesini dayandırmaq mümkün deyil” deyib.
