Patruşev: “NATO Ukraynadakı münaqişəni ideal ssenari hesab edir”
NATO Ukraynada sonu olmayan münaqişəni özü üçün ideal ssenari hesab edir.
AFN.az APA-ya istinadən xəbər verir ki, bunu Rusiya Təhlükəsizlik Şurasının katibi Nikolay Patruşev “Arqumenti i faktı” qəzetinə müsahibəsində bildirib.
"Əgər Ukrayna müstəqil qalsaydı və NATO və Avropa İttifaqına daxil olmaq ideyasını dəstəkləyən hazırkı marionet rejim tərəfindən idarə olunmasaydı, o zaman bütün nasistləri öz torpaqlarından çoxdan qovardı. Bu arada, ABŞ-ın rəhbərlik etdiyi bütün Şimali Atlantika Alyansı üçün ideal ssenari bu ölkədə sonu olmayan münaqişədir. Qərbə Ukrayna Rusiyaya qarşı müqavimət göstərmək, həm də köhnəlmiş silahların utilizasiyası üçün sınaq meydançası kimi lazımdır",- deyə Patruşev qeyd edib.
Patruşev onu da deyib ki, Rusiya xüsusi hərbi əməliyyatın müddəti üçün tələsmir, çünki Ukrayna nasizminin bir neçə ildən sonra daha da eybəcər formada başını qaldırmaması üçün onun tamamilə kökünü kəsmək vacibdir.
“Biz xüsusi hərbi əməliyyatın müddəti üçün tələsmirik. Nasizmin kökü ya yüz faiz kəsilməlidir, ya da o, bir neçə ildən sonra başını qaldıracaq və daha da çirkin formada olacaq”,- deyə Patruşev vurğulayıb.
