Türkiyə ordusunda yeni təyinatlar olub
Türkiyə Ali Hərbi Şurasının iclası başa çatıb.
Türkiyə Prezidenti Administrasiyasının sözçüsü İbrahim Kalın iclasda qəbul olunmuş qərarları açıqlayıb.
Qərara əsasən, 44 general və admiralın səlahiyyət müddəti 1 il, 320 polkovnikin səlahiyyət müddəti isə 2 il uzadılıb.
Bildirilib ki, 1 general yaş həddi səbəbindən 2021-ci il sentyabrın 1-dən, 29 general və admiral isə 2021-ci il avqustun 30-dan təqaüdə göndəriləcək.
Məlumata görə, 17 general və admiral bir üst rütbə, 56 polkovnikə isə general və admiral rütbələri verilib.
Bildirilib ki, Quru Qoşunları komandanı Ümit Dündar yaş həddi səbəbindən təqaüdə çıxdığı üçün Birinci ordu komandanı, ordu generalı Musa Avsevər Quru Qoşunları komandanı təyin edilib. Hərbi Hava Qüvvələri komandanı, ordu generalı Hasan Küçükakyüz və Hərbi Dəniz Qüvvələri komandanı, admiral Adnan Özbalın səlahiyyət müddəti bir il uzadılıb.
Hazırda 240 nəfər olan general və admiralların sayı 2021-ci il avqustun 30-dan sonra 266 olacaq.
Qərara əsasən, 2021-ci il avqustun 30-dan etibarən general-leytenant Selçuk Bayraktaroğlu və Ali Sivriyə ordu generalı, general-mayor Levent Ergün və Metin Tokelə general-leytenant, Hərbi Dəniz Qüvvələri Komandanlığından kontr-admiral Kadir Yıldıza vitse-admiral, Hərbi Hava Qüvvələri Komandanlığından general-mayor Rafet Dalgakırana general-leytenant rütbəsi verilib.
Briqada generalları İlkay Altındağ, Sebahattin Kılınç, Gültekin Yaralı, Rafet Kılıç, Fedai Ünsal, Tuncay Altuğ, Rasim Yaldız və Aydın Cihan Uzuna Quru Qoşunları Komandanlığından general-mayor, Hərbi Dəniz Qüvvələri Komandanlığından kontr-admiral Yalçın Payal və Həsən Özyurta, həmçinin Hərbi Hava Qüvvələri Komandanlığından briqada generalı Orxan Gürdala general-mayor rütbəsi verilib.(Report)
