Avstraliyada təyyarə qəzası: Parafild hava limanı hərəkət üçün bağlanıb
Cənubi Avstraliyanın Adelaida şəhəri yaxınlığındakı Parafild hava limanında kiçik təyyarənin anqara çırpılması nəticəsində yanğın baş verib.
AFN.az xəbər verir ki, hadisə ilə əlaqədar hava limanı bütün uçuşlar üçün qapadılıb. Cənubi Avstraliya polisinin verdiyi məlumata görə, kiçik təyyarə eniş cəhdi zamanı hələlik müəyyən edilməyən səbəbdən uçuş-enmə zolağının yaxınlığındakı anqara çırpılıb. Toqquşmanın təsirindən anqarda güclü yanğın başlayıb və ərazidən qatı qara tüstünün yüksəldiyi bildirilib.
Hadisə yerinə dərhal təcili xidmət qrupları cəlb edilib və təhlükəsizlik məqsədilə hava limanının ətrafındakı ərazilər təxliyə olunub. Hava limanının sözçüsü bütün hava hərəkətinin dayandırıldığını və yanğınsöndürənlərin alovla mübarizəni davam etdirdiyini açıqlayıb. Təyyarədə neçə nəfərin olduğu və ya anqarın daxilində yaralananların olub-olmaması ilə bağlı hələlik rəsmi məlumat verilməyib. Səlahiyyətli şəxslər tüstünün geniş sahəyə yayıldığını nəzərə alaraq, yaxınlıqda yaşayan sakinlərə qapalı məkanlarda qalmaları və hadisə yerindən uzaq durmaları barədə xəbərdarlıq ediblər.
