Sudanda ÇDQ-nin hücumları nəticəsində 50 nəfər ölüb
Sudanda 18 aydır ordu ilə vuruşan Çevik Dəstək Qüvvələrinin ölkənin mərkəzi bölgələrindəki Cəzirə əyalətində davam edən hücumları nəticəsində 50 nəfər həyatını itirib.
Sudanın Cəzirə əyalətindəki Hasahisa Şəhər Müqavimət Komitələrindən verilən açıqlamada Çevik Dəstək Qüvvələrinin Cəzirə əyalətində bəzi kəndlərə hücum etdiyi və bu hücumlar nəticəsində 50 nəfərin həyatını itirdiyi bildirilib.
Açıqlamada hücumlarda 200-dən çox insanın yaralandığı, tibbi yardımın kəndlərə çatmadığı və yaralıların müalicəsinin mümkün olmadığı bildirilib.
Sudan Suverenlik Şurasının sədri Əbdülfəttah əl-Burhan X platformasındakı paylaşımında, “Əl Daqalo terror milisləri günahsız vətəndaşların qanını tökməyə davam etdikcə, Sudan xalqının onlara qarşı daha da çox müqavimət əzmi artır” deyib.
Burhan beynəlxalq humanitar hüququn pozulması və insanlığa qarşı cinayətlərin cəzasız qalmayacağını da qeyd edib.
Mənbə: AA
