Makron solçuların təklifini rədd etdi
Fransa prezidenti Emmanuel Makron solçu Yeni Xalq Cəbhəsi alyansının respublikanın baş naziri postuna təklif etdiyi namizədliyi rədd edib.
AFN.az Fransa mediasına istinadən xəbər verir ki, bu barədə Yelisey sarayının kommünikesində deyilir.
"Məsləhətləşmələrdən sonra prezident bəyan etdi ki, Yeni Xalq Cəbhəsinin yeganə proqramı əsasında hökumət dərhal digər parlament partiyaları tərəfindən etimadsızlıq səsverməsinə məruz qalacaq” - deyə sənəddə qeyd edilir.
İyulun 23-də sol ittifaq Nazirlər Kabinetinin rəhbəri vəzifəsinə iqtisadçı Lusi Kastenin namizədliyini irəli sürüb.
Sənəddə həmçinin vurğulanır ki, avqustun 27-də partiya nümayəndələri və dövlət qulluğunda fərqlənmiş təcrübəli siyasətçilər ilə məsləhətləşmələrin yeni mərhələsi başlayacaq.
Bu günə qədər Fransa istefadan sonra hökumətin fəaliyyəti üzrə rekorda imza atıb. Makron baş nazir Qabriel Attalın hökumətini nazirlərin yeni kabinet formalaşana qədər vəzifələrini davam etdirmələri şərti ilə istefaya göndərib.
