Dünyada siqaret çəkənlərin sayı azalır - ÜST
Ümumdünya Səhiyyə Təşkilatının çərşənbə axşamı açıqladığı hesabatda deyilir ki, tütün istehlakı azalmaqda davam edir. ÜST-ün məlumatına görə, bu gün dünyada 1 milyard 250 milyon yetkin siqaret çəkən var.
Bu göstərici iki il əvvələ nisbətən 19 milyon azdır.
Ən yüksək göstəricilər əhalinin dörddə birindən çoxunun siqaret çəkdiyi Cənub-Şərqi Asiyadadır, Avropa ikinci yerdədir. ÜST ölkələri tütünə qarşı mübarizə siyasətini və tütün sənayesinə müdaxilələri həyata keçirməyə davam etməyə təşviq edir.
Problem yaradan region Avropadır. Bəzi ölkələrdə siqaret çəkən qadınların sayı ya artır, ya da ümumiyyətlə çox yüksək səviyyədə qalır.
Tütün istehlakında artım hələ də planetin altı ölkəsində - Konqo, Misir, İndoneziya, İordaniya, Oman və Moldovada müşahidə olunur.
ÜST məlumatları göstərir ki, əksər ölkələrdə 13-15 yaşlı uşaqlar tütün və nikotin məhsullarından istifadə edirlər. Yeniyetmələr arasında elektron siqaretdən istifadə qorxulu səviyyəyə çatıb.
Böyük Britaniyada son üç ildə elektron siqaretdən istifadə edən yeniyetmələrin sayı 150 faiz artıb.
Elektron siqaretlərin əksəriyyəti onlayn alındığından, ÜST hökumətlərə bu cihazların uşaqlar üçün əlçatan olmamasını təmin etməyi tövsiyə edir.
