TƏBİB: "Qrip əleyhinə peyvənd olunmaq üçün müraciət edənlərin sayı çoxdur"
TƏBİB-in icraçı direktoru Vüqar Qurbanov qrip əleyhinə peyvəndlənmək üçün müraciət edənlərin sayının çox olduğunu bildirib.
O, bu barədə "Report"un sualını cavablandırarkən jurnalistlərə açıqlamasında danışıb.
"Azərbaycana gətirilən qrip əleyhinə peyvəndlərin vurulması prosesinə yeni başlanılsa da, müraciətlərin sayı çoxdur. İlin sonunda statistik rəqəmləri dəqiq demək olar", - TƏBİB sədri qeyd edib.
V.Qurbanov bildirib ki, ölkədə qızılca əleyhinə aidiyyəti səhiyyə orqanları tərəfindən lazımi addımlar atılır: "Xəstə sayı ilə bağlı vəziyyət stabildir. Gərginliyə səbəb olacaq hal müşahidə olunmur. Səhiyyə Nazirliyi tərəfindən vaksinasiya ilə bağlı da ciddi addımlar atılır, TƏBİB-in tabeli müəssisələrdə də peyvənd vurulması yüksək səviyyədə həyata keçirilir. Qızılca ilə əlaqəli həm ambulator, həm də stasionar şəraitdə müalicə alan şəxslərə ciddi nəzarət olunur".
