Filippin prezidenti ölkə əhalisini şirin suya qənaət etməyə çağırıb
Filippin prezidenti kiçik Ferdinand Markos El Nino təbii hadisəsinin səbəb ola biləcəyi quraqlıq təhlükəsi səbəbindən ölkə əhalisini şirin suya qənaət etməyə çağırıb.
AFN.az xarici mediaya istinadən xəbər verir ki, o, bunu bazar ertəsi "GMA News" kanalında xalqa müraciəti zamanı deyib.
"Biz yaxın aylarda inkişaf edə biləcək El Ninoya hazırlaşırıq. Hazırlıqlara, bufer su ehtiyatlarının yaradılmasına və suvarma avadanlıqlarının sınaqdan keçirilməsinə başlamışıq. Lazım gələrsə, buludları əkəcəyik ki, yağış yağsın. Bütün bunlarla yanaşı, hər yerdə quraqlıq təhlükəsinə hazırlaşmaq üçün xalqımızı suya qənaət etməyə çağıracağıq".
Filippin prezidenti əlavə edib ki, ölkə üzrə 6000-dən çox yağış suyu yığan sistem quraşdırılıb. Eyni zamanda, hökumət su təchizatı layihələrinin həyata keçirilməsinə 270 milyon dollar ayırıb.
El Nino orta hesabla 2-7 ildə bir dəfə baş verir və adətən 9-12 ay davam edir. Bu təbiət hadisəsi mərkəzi və şərq tropik Sakit okeanda okean səthinin temperaturunun artması ilə əlaqədardır və şiddətli quraqlığa səbəb ola bilər. Ümumdünya Meteorologiya Təşkilatı daha əvvəl El Nino-nun ilin ikinci yarısında əmələ gəlməsi ehtimalının 90% olduğunu bildirmişdi.
