Dövlət əmlakının özəlləşdirilməsi qaydası dəyişib
Prezident İlham Əliyev “Dövlət əmlakının özəlləşdirilməsi haqqında” qanunun icrası ilə bağlı əlavə tədbirlər barədə” 23 dekabr 2000-ci il tarixli fərmana, 22 iyun 2010-cu il tarixli fərmanla təsdiq edilmiş “Daşınmaz dövlət əmlakı obyektlərinin müsabiqə əsasında icarəyə verilməsi Qaydaları”na, 9 dekabr 1999-cu il tarixli fərmanla təsdiq edilmiş "Dövlət əmlakının Registri haqqında Əsasnamə”yə, 19 dekabr 1997-ci il tarixli fərmanla təsdiq edilmiş “Özəlləşdirilən müəssisə və obyektlərin yerləşdiyi torpaq sahələrinin satılması qaydaları haqqında Əsasnamə”yə, 23 oktyabr 2003-cü il tarixli fərmanla təsdiq edilmiş “Dövlət və bələdiyyə mülkiyyətində olan torpaqların mülkiyyətə və ya icarəyə verilməsi ilə bağlı torpaq müsabiqələrinin və hərraclarının keçirilməsi Qaydaları”na dəyişiklik edib.
Dövlət başçısı bununla bağlı yeni fərmanlar imzalayıb.
Fərmanlara əsasən, lazımi sənədləri və yaxud məlumatları Elektron Hökumət İnformasiya Sistemi vasitəsilə müvafiq dövlət qurumundan əldə etmək mümkün olduqda, həmin sənədlər və ya məlumatlar vətəndaşlardan tələb edilməyəcək. Belə sənədləri və ya məlumatları Elektron Hökumət İnformasiya Sistemi vasitəsilə əldə etmək mümkün olmadığı hallarda onların təqdim edilməsi vətəndaşın razılığı ilə sorğu əsasında müvafiq dövlət qurumundan tələb olunacaq və ya vətəndaş tərəfindən təmin ediləcək.
