Gələn il Yer kürəsinin ən isti ili ola bilər
Britaniya Meteorologiya İdarəsinin 2023-cü il üçün proqnozlarına əsasən, gələn il dünyanın ən isti illərindən biri ola bilər.
AFN.az xəbər verir ki, temperaturun orta hesabla 1,20 °C artacağı bildirilir. Britaniya Meteorologiya İdarəsinin hesabatında dünyanın son 3 ildə La Ninanın təsiri altında olduğu və bu vəziyyətin havanı soyutduğu vurğulanıb. Qeyd edilib ki, La Ninanın 2023-cü ildə bitməsi gözlənilir.
2023-cü il üçün qlobal temperatur proqnozu hesabatında ən isti illərin 2014-cü ildə başladığı və o vaxtdan bəri qlobal temperaturun orta hesabla 1,0 °C artdığı vurğulanıb. Bu ilin proqnoz hesabatında irimiqyaslı vulkan püskürmələrinin nəzərə alınmadığı bildirilib və belə vulkan püskürmələrinin Yer kürəsini müvəqqəti olaraq soyutduğu qeyd edilib.
La Nina nə deməkdir?
La Nina mərkəzi və şərq-mərkəzi ekvatorial Sakit okeanda okean səthinin temperaturunun dövri soyumasına aid prosesdir. Güclü küləklər okeanın səthindən Cənubi Amerikadan İndoneziyaya doğru isti suyu hərəkət etdirdikcə dərinlikdən soyuq su Cənubi Amerika sahillərinə yaxın səthə qalxır və soyuducu rolunu oynayır. Tipik olaraq, La Nina hadisələri hər 3-5 ildən bir baş verir, lakin bəzən ardıcıl illərlə də baş verə bilər.
