Su pulunun artırılması etirazlara səbəb oldu: Əslində 1 manat hesablayın...
Xəbər verdiyimiz kimi, Tarif Şurası iclas keçirərək suyun qiymətini 2 dəfə artırıb. İclasda bir kubmetr su təchizatının tarifi ƏDV daxil olmaqla əhali üzrə Bakı, Sumqayıt, Xırdalan şəhərləri və Abşeron rayonu üçün 70 qəpik, digər inzibati ərazi vahidləri üzrə 60 qəpik, tullantı sularının axıdılması xidmətinin tarifi isə ölkə üzrə bir kubmetr üçün 30 qəpik səviyyəsində təsdiq olunub.
İqtisadçı ekspert Rövşən Ağayev bu qərarı şərh edərkən bildirib ki, əslində istehlak olunan suyun qiymətini 70 qəpik yox, 1 manat hesablamaq lazımdır: "Çünki hökumət mənzildə nə qədər su istehlak eləsəniz, onu kanalizasiya və qeyri-kanalizasiya istehlakı kimi ayırmır - bütün istehlakı içməli su və kanlizasiya tarifinə birlikdə vuraraq qəbzdə cəmi ödəməli olduğumuz haqqı yazır. Məsələn, sizin ailə ayda 10 kub su işlədib, onun 1 kubu şəxsi istehlaka, məzilinizdəki güllərinizi suvarmağa getsə də, həmin 1 kuba da kanalizasiya xidmətinin tarifi əsasında hesablanacaq.
Azərbaycan vətəndaşının büdcəsi üçün 1 manat su haqqı çox yüksəkdir. Hətta çox insafsız şəkildə minkmum istehlak normaları tətbiq olunan mimimum xidmətlər səbəttində hər ay bir sakin üçün 10 kub istehlakı nəzərdə tutulur. 4 nəfərlik ailə üçün minimum 30 kub işlənir - hətta israfçılıq olmadan belə. Bu 30 manat edəcək".
Ekspertin sözlərinə görə, kommunal xidmət şirkətləri boğaza qədər korrupsiyanın içərisində olmasa idi, adi bir şöbə rəhbəri 100-150 minlik maşında gəzməsə idi, şəffaflıq hesabatlılıq və qiymət əmələgəlmə sistemi olsa idi, xidmətlər keyfiyyətli olsa idi,qiymətərin hətta bahalığı belə insanları indiki qədər narazı qalmazdı: "Hökumət ciddi və real islahatlar aparmadan iqtisadiyyatın ağır yükünü vətəndaşların çiyninə yükləyir. Məmurların vətəndaşın cibindən hiss olunur ki, real məlumatları yoxdur. Müstəqil araşdırmaları qoyuram kənara, özünüzün az-çox qalmış peşəkar məmurlarınızdan soruşun ki, niyə bu ölkədə az qala 5 ildir ailə büdcələrinin qənaəti mənfi zolağa keçib. Bu göstəricinin hansı real vəziyyətin nəticəsi olduğunu onlar sizə deyəcək..."
