Marsda sirli izlər: NASA-nın “Curiosity” aparatı qeyri-adi dəliklər aşkar etdi
NASA-nın Marsda fəaliyyət göstərən “Curiosity” kosmik aparatı planetin geoloji keçmişi ilə bağlı yeni və qeyri-adi quruluş qeydə alıb.
AFN.az xəbər verir ki, 14 ildir Qeyl kraterində araşdırmalar aparan aparat bu dəfə səthdə mənşəyi hələ müəyyənləşdirilməyən kiçik dəliklər aşkarlayıb.
“Curiosity” hazırda Şarp dağı üzərində yerləşən sulfatlarla zəngin təbəqələrin olduğu Valle Grande ərazisində tədqiqatlarını davam etdirir. Aparatın çəkdiyi görüntülərdə səthdə təxminən 1 santimetr enində, dayaz və kiçik dəliklər müşahidə olunub.
Alimlərin diqqətini çəkən əsas məqam isə bu strukturların ətrafında əvvəlki çökəkliklərdə rast gəlinən aşınmış çınqıl və ya mineral qalıqlarının olmamasıdır. Dəliklərin geniş və olduqca dayaz quruluşa malik olması onların Marsda indiyədək məlum olan aşınma proseslərindən fərqli mexanizmlə yarana biləcəyini göstərir.
Curiosity komandası dəliklərin necə yarandığını müəyyənləşdirmək üçün əlavə görüntülər əldə etməyə başlayıb. Bunun üçün aparatın üzərində yerləşən MAHLI və Mastcam kameralarından istifadə edilir.
Ərazidən çəkilən yaxın plan görüntüləri ilə yanaşı, səthin üçölçülü modelləri də hazırlanır. Alimlər bu məlumatların yeni strukturların formalaşma mexanizmini daha dəqiq anlamağa imkan verəcəyini gözləyirlər.
“Curiosity” son günlərdə Şarp dağına qalxışı zamanı 1000 metrlik hündürlük artımı həddini də keçib. Aparat hazırda bölgədəki müxtəlif qaya təbəqələrinin kimyəvi tərkibini və onların aşınma xüsusiyyətlərini araşdırır.
Elmi qrupun qarşısında əsas sual bu strukturların Marsda indiyədək naməlum olan eroziya prosesinin nəticəsi olub-olmamasıdır. Digər ehtimal isə dəliklərin süxurların fərqli fiziki xüsusiyyətləri ilə bağlı yaranmasıdır. Bu suala cavab vermək üçün əldə olunan məlumatların təhlili davam etdiriləcək.
