İlon Maskın tarixdə ilk trilyonçu statusu dəqiqləşdirmə tələb edir
"SpaceX" şirkətinin IPO-ya (səhmlərin ilkin kütləvi təklifi) çıxması sayəsində İlon Maskın tarixdə ilk trilyonçu statusu qazanması barədə məlumatlar tam reallığı əks etdirmir.
AFN.az xəbər verir ki, bu barədə "The Washington Post" (WP) qəzeti təhlil dərc edib.
Nəşrin hesablamalarına görə, kağız üzərində Maskın "SpaceX" və "Tesla"dakı payı 1,1 trilyon dollar dəyərində qiymətləndirilsə də, sahibkar bu vəsaitin bir hissəsini yalnız uzaq gələcəkdə əldə edə bilər. Şirkət tərəfindən 867 milyard dollar dəyərində qiymətləndirilən "SpaceX" səhm paketləri yalnız Marsda insan koloniyasının yaradılması kimi iddialı hədəfə çatdıqdan sonra rəsmiləşə bilər. Bundan əlavə, Maskın gəlirlərinin bir hissəsi adi maaş kimi deyil, kosmosda məlumatların emalı mərkəzlərinin yaradılması kimi xüsusi tapşırıqlara bağlı səhm paketləri şəklində ödənilir. Bu şərti səhmlər nəzərə alınmadıqda, Maskın mövcud sərvəti trilyonçu statusu üçün kifayət etmir. IPO öncəsi "SpaceX"in süni intellektin inkişafı ilə bağlı ciddi zərərlər açıqladığı da qeyd olunur.
Xatırladaq ki, "SpaceX" iyunun 11-də birjaya çıxarılacaq səhmlərinin sayını və qiymətini açıqlayıb. Şirkət hər biri 135 dollardan olmaqla 555 555 555 ədəd səhm yerləşdirib. Qiymətli kağızlar iyunun 12-dən etibarən "Nasdaq" birjasında "SPCX" indeksi altında ticarət olunmağa başlayır.
