"Brent" markalı neftin bir bareli 94,96 dollardan satılıb
Beynəlxalq fyuçers bazarlarında "Brent" markalı neftin bir barelinin qiyməti 94,96 dollar səviyyəsində qərarlaşıb.
AFN.az xəbər verir ki, bu gün səhər saatlarına olan məlumata görə, "Brent" neftinin qiyməti əvvəlki bağlanışla müqayisədə təxminən 0,03 faiz artaraq 94,96 dollar olub. Eyni dəqiqələrdə isə "West Texas Intermediate" (WTI) markalı xam neftin bareli 91,61 dollardan alıcı tapıb.
Qiymətlərin artmasına ABŞ-ın İran nefti alan ölkələrə qarşı sanksiyalar tətbiq edə biləcəyi ilə bağlı mesajları və ölkədəki neft ehtiyatlarının azalması nəticəsində yaranan təklif narahatlıqları təsir göstərir. ABŞ-ın Xəzinə naziri Skott Bessent bildirib ki, İran neftini alan və ya bu ölkəyə məxsus vəsaitləri banklarında saxlayan tərəflərə qarşı sanksiya tətbiq etməkdə qərarlıdırlar.
İran neftinin 90 faizindən çoxunu alan Çinin bu ticarət vasitəsilə ümumi enerji ehtiyacının 8 faizini qarşıladığını qeyd edən Bessent, Hörmüz boğazındakı blokada səbəbindən alışlarda azalma gözlədiklərini vurğulayıb. Həmçinin Rusiya və İran neftinin dəniz yolu ilə satışına icazə verən müvəqqəti güzəştlərin yenilənməyəcəyi bildirilib.
Digər tərəfdən, ABŞ Enerji İnformasiya Administrasiyası (EIA) ölkədəki kommersiya xam neft ehtiyatlarının ötən həftə 900 min barel azalaraq 463 milyon 800 min barelə düşdüyünü açıqlayıb. Bazarın artım gözləntilərinin əksinə olaraq baş verən bu azalma qiymətləri yuxarı istiqamətdə dəstəkləyib.
Bununla belə, ABŞ və İran arasında atəşkəsin uzadılması ilə bağlı danışıqların davam etməsi qiymətlərdəki kəskin artımı məhdudlaşdırır. Pakistanın vasitəçiliyi ilə başlayan və 22 apreldə başa çatması gözlənilən müvəqqəti atəşkəs prosesi bazarlarda ehtiyatlı nikbinliyə səbəb olub. Ekspertlər "Brent" nefti üçün 95,45 dolları müqavimət, 94,19 dolları isə dəstək zonası kimi izləməyi tövsiyə edirlər.
