NATO müttəfiqləri müdafiə xərclərini artırıb
NATO müttəfiqləri keçən il müdafiə xərclərini əvvəlki illə müqayisədə 10,43 faiz artıraraq, 23 ölkə Ümumi Daxili Məhsulunun (ÜDM) 2 faizini müdafiəyə xərcləmə hədəfinə çatıb.
NATO-nun baş katibi Mark Rutte tərəfindən hazırlanan 2024-cü il üzrə İllik Hesabatda qeyd olunub ki, Alyans daha təhlükəli və gözlənilməz qlobal təhlükəsizlik mühitinə sürətlə uyğunlaşmalıdır.
“Çevik və Yenilikçi Alyans” başlıqlı hesabatda NATO-nun Ukraynada davam edən müharibə, Çin, Şimali Koreya, İran və Rusiyadan gələn təhdidlərin artması və texnoloji müharibə qarşısında çəkindirmə, müdafiə və dayanıqlılığa diqqət yetirdiyi bildirilib.
Rutte ön sözündə 2024-cü ilin NATO üçün dərin transformasiya ili olduğunu ifadə edərək, "2024-cü ildə NATO Soyuq Müharibədən sonra qəbul edilmiş ən əhatəli və iddialı yeni müdafiə planı əsasında kollektiv çəkindirmə və müdafiə mövqeyini gücləndirməyə davam etdi" ifadəsini işlədib.
Rutte bildirib ki, 2024-cü ilin ən mühüm mərhələlərindən biri NATO-nun yeni regional müdafiə planlarının tam şəkildə aktivləşdirilməsi və quru, dəniz, hava, kiberməkan və kosmos daxil olmaqla bütün sahələrdə müharibəyə hazır 500 min əsgərin yerləşdirilməsi olacaq.
Bu qüvvələrin 90 mindən çox əsgərin iştirak etdiyi NATO-nun Soyuq Müharibədən bəri ən böyük hərbi təlimi olan “Sabit Müdafiəçi 2024”də sınaqdan keçirildiyini xatırladan Rutte, NATO ərazisinin hər yerində böhranlara cavab vermək üçün 10 gün ərzində yerləşdirilə biləcək yeni Müttəfiq Reaksiya Qüvvələrinin aktivləşdirildiyini xatırladıb.
Avropalı müttəfiqlərin və Kanadanın müdafiə xərclərini 2023-cü ilə nisbətən 19,4 faiz artırdığına diqqət çəkən Rutte, cəmi 486 milyard dollar sərmayə qoyulduğuna dair məlumatı paylaşıb.
Müttəfiqlərin 10-cu il ardıcıl olaraq müdafiə xərclərini artıraraq daha böyük məsuliyyət daşıdıqlarını qeyd edən Rutte "2025-ci ildə bu səyləri əhəmiyyətli dərəcədə sürətləndirməliyik. Avropalı müttəfiqlər və Kanada öz töhfələri və imkanları baxımından əhəmiyyətli bir sıçrayış etməlidir" deyib.
