ABŞ Çin gəmilərindən rüsum almaq üçün hərəkətə keçdi
ABŞ Ticarət Nümayəndəliyi Çində yerləşən gəmi sahiblərindən və Çin istehsalı olan gəmilərin operatorlarından xalis tonaj və ya konteynerlərin sayına görə ödəniş etmək planını açıqlayıb.
ABŞ Ticarət Nümayəndəliyinin (USTR) ofisindən verilən açıqlamada Amerika gəmiqayırma sənayesinin bərpası və Çinin dənizçilik, logistika və gəmiqayırma sənayelərində hökmranlıq etmək üçün əsassız hərəkətləri, siyasətləri və tətbiqləri ilə bağlı addımların atıldığı bildirilib.
Açıqlamada bunun 1 ilə yaxın davam edən araşdırmadan sonra gəldiyi və bu kontekstdə ictimai rəyin də alındığı bildirilib.
Qeyd olunub ki, yeni tədbirlər iki mərhələdə həyata keçiriləcək və ilk 180 gün ərzində heç bir ödəniş tətbiq edilməyəcək.
Bu müddətin sonunda Çində yerləşən gəmi sahibləri və operatorlarından ABŞ səfəri başına xalis tonaj əsasında, Çin istehsalı olan gəmilərin operatorlarından isə xalis tonaj və ya konteynerə görə haqq alınacağı və bunların mərhələli şəkildə artırılacağı bildirilib.
Açıqlamada 3 il ərzində reallaşacaq ikinci mərhələ çərçivəsində ABŞ istehsalı olan mayeləşdirilmiş təbii qaz (LNG) gəmilərini təşviq etmək məqsədi ilə xarici gəmilər tərəfindən LNG daşınmasına məhdudiyyətlərin tətbiq ediləcəyi və bu məhdudiyyətlərin 22 il ərzində mərhələli şəkildə artacağı bildirilib.
Liman avadanlıqları üçün yeni gömrük tariflərinin də gündəmdə olduğu və bu çərçivədə ictimai rəyin istəndiyi bildirilib.
