Almaniyada ümumi seçkilərdə səsvermə başlayıb
Almaniyada insanlar ümumi seçkilərdə səs vermək üçün sandıq başına gedirlər.
Ölkədə 21-ci dövr Federal Parlamentinə (Bundestaq) qatılacaq deputatların seçilməsi üçün səsvermə prosesi yerli vaxtla saat 08:00-da başlayıb.
Seçicilər yerli vaxtla saat 18:00-a qədər səs verə biləcəklər.
59,2 milyon seçicinin səsvermə hüququna malik olduğu seçkilərdə 29 partiya iştirak edir.
İlk dəfə səs verən gənclərin sayı 2,3 milyon, yaşı 70-dən yuxarı olan seçicilərin sayı isə 13,7 milyon olaraq açıqlanıb.
Seçkilərdə 630 yerlik parlamentdə deputat olmaq üçün 1422-si qadın olmaqla 4506 namizəd mübarizə aparır.
Almaniyada 16 əyalətdə qurulan 299 seçki dairəsindəki təxminən 90 min seçki məntəqəsində 675 min adam xidmət göstərəcək.
