Kosmosda peyk müəmmalı şəkildə parçalandı
Yerin orbitində zibillərin sürətlə artmasına yenisi əlavə edilib. Böyük bir rabitə peyki müəmmalı şəkildə parçalanaraq Avropa, Mərkəzi Afrika, Yaxın Şərq, Asiya və Avstraliyadakı rabitə istifadəçilərinə təsir edib.
Ekvator ətrafında sabit orbitdə, Hind okeanından təxminən 35 min kilometr yüksəklikdə yerləşən "Intelsat 33e" peyki genişzolaqlı internet xidməti təqdim edirdi. Lakin oktyabrın 20-də verilən ilk məlumatlarda peykin birdən-birə gücünü itirdiyi bildirilib. Bir neçə saat sonra ABŞ Kosmik Qüvvələri peykin ən azı 20 hissəyə parçalandığını təsdiqləyib.
Bəs nə baş verib? Daha da önəmlisi, kosmosa daha çox peyk göndərildikcə bu cür hadisələrin artacağını gözləmək lazımdırmı?
"Intelsat 33e"nin dağılmasına nəyin səbəb olduğu hələ məlum deyil. Halbuki belə hadisələr əvvəllər də olub.
Peyklərin qəsdən məhv edilməsi cəhdləri, təsadüfi toqquşmalar və ya günəş fəaliyyətinin təsirləri nəticəsində peyk itkiləri də keçmişdə qeydə alınıb. Bu peykin də tarixi var. 2016-cı ildə "Boeing" tərəfindən istehsal olunan "Intelsat 33e" buraxılışdan sonra orbitinə çatmaqda üç ay gecikib.
Bundan əlavə, təkan sistemindəki problemlər peykin ömrünü planlaşdırıldığından 3,5 il tez bitirməsi demək idi. Buna görə də şirkət 78 milyon dollarlıq sığorta iddiası qaldırıb. Lakin dağılan zaman peykin sığortalanmadığı bildirilib.
Hazırda "Intelsat" problemin səbəbini araşdırır, lakin biz dəqiq səbəbi öyrənməyə də bilərik.
