Qazaxıstanda daşqınlar səbəbindən minlərlə insan təxliyə edilib
Qazaxıstanda əriyən qarın yaratdığı daşqın səbəbindən 46 min 755 nəfər başqa yerlərə köçürülüb, 10 əyalətdə yerli miqyasda fövqəladə vəziyyət elan edilib.
Qazaxıstan güclü yağışlı qışdan sonra temperaturun artması səbəbindən qarın qəfil əriməsi nəticəsində baş verən daşqınlarla mübarizə aparır.
Ölkədə bəndlər dolub, çaylar daşıb. Seldən ən çox zərər çəkən qərb və şimal əyalətlərində 3 min 171 evi su basıb.
Fövqəladə Hallar Nazirliyinin verdiyi məlumata görə, bu günə qədər 46 min 755 nəfər, o cümlədən 14 min 589 uşaq su basmış ərazilərdən təxliyə edilib. Bu adamlardan 2602 nəfəri helikopterlər vasitəsilə xilas edilib. Bundan əlavə, 60 min xırda və iribuynuzlu heyvan təxliyə edilib.
Ölkənin qərbindəki Atrau vilayətində dünən gecə saatlarında Cem çayının daşması nəticəsində Kulsari şəhəri tamamilə su altında qalıb. Təxminən 14 min insan şəhərdən təxliyə edilib.
Qazaxıstan Prezidenti Kasım Cömert Tokayev daşqınla əlaqədar ictimaiyyətə müraciət edib.
Uzun illərdir görünməmiş təbii fəlakətlə üzləşdiklərini bildirən Tokayev, bu sel miqyası və nəticələri baxımından son 80 ilin ən böyük fəlakətidir deyib.
Tokayev bildirib ki, ölkənin 10 vilayətində (Abay, Akmola, Aktobe, Atrau, Qərbi Qazaxıstan, Qaraqandı, Kostanay, Pavlodar, Şimali Qazaxıstan və Ulutau) yerli miqyasda fövqəladə vəziyyət elan edilib.
Tokayev bildirib ki, insan tələfatının qarşısının alınması onların prioritet vəzifəsidir və daşqından zərər çəkən vətəndaşlara dövlət tərəfindən lazımi maliyyə dəstəyi və digər yardımlar göstəriləcək.
Daşqın bölgələrinə əlavə hərbi hissələrin göndəriləcəyini bildirən Tokayev qeyd edib ki, təzminatların ödənilməsi üçün işə başlamaq barədə göstəriş verib.
Tokayev bəyan edib ki, baş nazir Oljas Bektenovun rəhbərlik etdiyi kabinet üzvləri vəziyyət sabitləşənə qədər daşqınlara qarşı mübarizə bölgələrində işlərini davam etdirəcəklər.
