Astana hava limanında yanğın səbəbindən 20-yə yaxın reys təxirə salınıb
Bu gün səhər Astana Beynəlxalq Hava Limanında yanğın baş verməsi səbəbindən 20-yə yaxın reys təxirə salınıb.
Bu barədə hava qovşağının mətbuat xidməti özünün Telegram kanalında məlumat yayıb.
“Fevralın 27-də saat 07:50-də Astana Beynəlxalq Hava Limanının kommutasiya mərkəzindən yanğın xəbəri daxil olub. Saat 08:24-də yanğın tamamilə lokallaşdırılıb. Yanğının söndürülməsi zamanı güclü tüstülənmə səbəbindən hava limanının bütün sərnişinləri təhlükəsiz yerə təxliyə edilib”, - məlumatda deyilir.
Yanğın səbəbindən Astana hava limanı gələn reysləri qəbul etməyi dayandırmayıb, lakin 18 reys gecikib. Belə ki, xüsusilə Dubay, Çimkənd, Almatı, İstanbul və Sankt-Peterburqa gedən təyyarələr vaxtında havaya qalxmayıb.
“Gecikmiş uçuşların dəqiq uçuş vaxtı məlum deyil”, - deyə hava limanından əlavə ediblər.
Sərnişinlərə su, içkilər veriləcək və yüngül yeməklər veriləcək. Aeroport administrasiyası hadisəyə görə üzr istəyib.
