2023-cü il ən isti il kimi qeydə alınıb
2023-cü il iqlim dəyişikliyi və təbii El Nino hava hadisəsinin təsiri ilə qeydə alınmış ən isti il kimi təsdiqlənib.
Avropa Birliyinin (AB) İqlim Monitorinq Xidməti Kopernik 2023-cü ilin qalıq yanacaqların insanlar tərəfindən geniş şəkildə istifadə olunmağa başlamasından əvvəlki dövrün orta göstəricisindən 1,48 dərəcə daha isti olduğunu bildirir.
BBC-nin təhlilinə görə, qlobal hava istiliyi iyul ayından etibarən demək olar ki, hər gün ardıcıl rekordlar qırıb. Dəniz səthinin temperaturu da əvvəlki göstəriciləri keçib.
Bu qlobal rekordlar qlobal istiləşmə üçün müəyyən edilmiş kritik iqlim hədəflərinə çatmamaq riskini artırır.
Texas A&M Universitetinin atmosfer elmləri üzrə professoru Andrey Dessler deyir: “Məni heyrətə gətirən 2023-cü ilin təkcə rekordu qırması deyil, həm də əvvəlki rekordları böyük fərqlə üstələməsidir”.
İnsanların atmosferə karbon dioksid kimi rekord miqdarda istixana qazları buraxmağa davam etməsi səbəbi ilə indi dünya 100 il əvvəlkindən daha istidir.
Lakin 12 ay əvvəl heç bir böyük elmi təşkilat Yer kürəsinin iqliminin mürəkkəb davranışına görə 2023-cü ilin ən isti il olacağını proqnozlaşdırmırdı.
İlin ilk bir neçə ayında yalnız az sayda gün temperatur rekordları qırdı.
Ancaq sonra Yer üzündə, 2023-cü ilin ikinci yarısında diqqətçəkən bir sıra gündəlik rekordlar izləndi.
