ABŞ müsadirə etdiyi İran mərmilərini Ukraynaya göndərib
ABŞ İrandan müsadirə etdiyi 1,1 milyon mərminin Ukraynaya göndərildiyini təsdiqləyib.
Ağ Evin sözçüsü Karine Jan-Pier gündəlik mətbuat konfransında jurnalistlərin suallarını cavablandırıb.
Birləşmiş Millətlər Təşkilatının (BMT) Təhlükəsizlik Şurasının qətnaməsini pozaraq, İran tərəfindən Yəməndəki husi milislərinə göndərildiyi düşünülən 1,1 milyon mərminin dekabr ayında ABŞ tərəfindən müsadirə edildiyini xatırladan Jan-Pier, bu sursatların Ukraynaya verildiyini təsdiqləyib.
"ABŞ Mərkəzi Komandanlığına bağlı dəniz piyada qüvvələri beynəlxalq hüququ pozaraq, İran İnqilab Keşikçiləri Qvardiyasından Yəməndəki silahlı qruplaşmalara göndərilən bu sursatları müsadirə ediblər" - deyə Jan-Pier bildirib.
İranın bu addımının BMT Təhlükəsizlik Şurasının 2216 saylı qətnaməsinin pozulması olduğunu bildirən Jan-Pier, "Ukraynanın tiranlığa qarşı azadlıq mübarizəsini dəstəkləmək və İranın regionda və onun hüdudlarından kənarda sabitliyi pozan fəaliyyətlərinin qarşısını almaq üçün addımlar atmağa davam edəcəyik" - deyə əlavə edib.
O bildirib ki, Ukraynaya verilən sursat yardımı ABŞ-ın bu məsələdə verdiyi vədlərin arxasında dayandığının sübutudur.
