"ABŞ Azərbaycan və Ermənistan arasında birbaşa dialoqu təşviq edir" - Ned Prays
"ABŞ tərəfdaşları ilə birlikdə Azərbaycan və Ermənistan arasında birbaşa dialoqda iştirak etməkdə və "Dağlıq Qarabağ" münaqişəsi ilə bağlı məsələlərin həlli istiqamətində səy göstərməkdə davam edir".
AFN.az-ın məlumatına görə, ABŞ Dövlət Departamentinin sözçüsü Ned Prays keçirdiyi brifinqdə belə deyib.
“Birləşmiş Ştatlar Cənubi Qafqaz regionu üçün təhlükəsiz, sabit, demokratik, firavan və dinc gələcəyin təşviqinə sadiqdir. Biz "Dağlıq Qarabağ" münaqişəsi ilə bağlı bütün mövcud problemlərin həlli yollarını tapmaq üçün Azərbaycan və Ermənistan arasında birbaşa dialoqu təşviq etmək üçün Avropa İttifaqı kimi həmfikir tərəfdaşlarla, eləcə də ATƏT kimi beynəlxalq təşkilatlarla ikitərəfli əməkdaşlığı davam etdiririk"-Prays qeyd edib.
ABŞ Dövlət Departamentinin rəsmi nümayəndəsi Dövlət katibi Entoni Blinkenin Ermənistan və Azərbaycandan olan həmkarları arasında Vaşinqton və Nyu-Yorkda təşkil etdiyi görüşləri xatırladıb.
“Biz Cənubi Qafqazın təhlükəsiz, sabit, demokratik, firavan və sülhsevər region kimi görünməsini inkişaf etdirmək üçün ən yaxşı perspektivlərə malik olduğuna inandığımız işi davam etdirəcəyik. Biz əlbəttə ki, tərəflərin özlərinin irəliləyiş əldə etmələrini istəyirik. Bu münaqişənin hərtərəfli həllinin nə olacağı bizim qərarımız deyil. Bu, tərəflərin özlərinin etməli olduğu çətin işdir"- deyə Dövlət Departamentinin sözçüsü əlavə edib.
Ned Prays yekun həllə nail olmaq üçün tərəflərlə işin davam etdiriləcəyini bildirib.
“Biz "mənzil başı"na çatmağa kömək etmək üçün hər gün qarşılıqlı fəaliyyət göstəririk və ATƏT, eləcə də digər tərəfdaşlar vasitəsilə ikitərəfli və üçtərəfli səviyyədə tərəflərlə sıx işləməyə davam edəcəyik.”
M.Vahidli
