Niderland Ukrayna HHQ-yə "Alkmaar" tipli mina əleyhinə gəmi təhvil verib
Ukrayna Hərbi Dəniz Qüvvələri (HDQ) Niderlanddan daha bir mina əleyhinə gəmi qəbul edib.
AFN.az xəbər verir ki, bu barədə Ukrayna HDQ-nin komandanı Aleksey Neijpapa özünün "Facebook" hesabında məlumat paylaşıb.
"Dəniz imkanları koalisiyası çərçivəsində niderlandlı tərəfdaşlar Ukrayna Silahlı Qüvvələrinin Hərbi Dəniz Qüvvələrinə "Alkmaar" sinfinə aid mina axtaran gəmi təhvil veriblər", - deyə o qeyd edib.
Komandanın sözlərinə görə, bu təhvil-təslimdən sonra Ukrayna HDQ-nin tərkibindəki mina əleyhinə gəmilərin sayı 5-ə çatıb. Neijpapa əlavə edib ki, bundan əvvəl Böyük Britaniya Ukraynaya "Sandown" sinfindən olan "Çerkassı" və "Çerniqov" gəmilərini, Belçika və Niderland isə "Alkmaar" sinfindən olan "Melitopol" və "Mariupol" gəmilərini təqdim etmişdi.
Məlumatda o da bildirilir ki, Niderland ukraynalı hərbçilərin təlimində də yaxından iştirak edir. 2022-ci ildən bəri bu ölkənin dəstəyi ilə Ukrayna Silahlı Qüvvələrinin təxminən 60 min hərbi qulluqçusu hazırlıq keçib.
