Vaşinqton NATO-nun ABŞ üçün hələ də dəyərli olub-olmadığını müzakirə edəcək
Amerika administrasiyası Şimali Atlantika Müqaviləsi Təşkilatının (NATO) ABŞ üçün hələ də dəyərli olub-olmadığı barədə sual ətrafında düşünür və bu mövzunu Avropadakı müttəfiqləri ilə müzakirə etmək niyyətindədir.
AFN.az xəbər verir ki, bu barədə ABŞ-ın Dövlət katibi Marko Rubio bəyan edib.
"Mən NATO-nun Avropa üçün hansı dəyərə malik olduğunu başa düşürəm. Təşkilat eyni zamanda Amerika Birləşmiş Ştatları üçün də dəyərli olmalıdır", - deyə o, Şimali Atlantika Alyansına üzv ölkələrin xarici işlər nazirlərinin İsveçdə keçirilən iclası çərçivəsində jurnalistlərlə söhbətində bildirib.
ABŞ diplomatiyasının rəhbəri konstatasiya edib ki, NATO-nun ABŞ üçün az qala ən əsas dəyəri, o cümlədən Avropadakı hərbi bazalardan istifadə etməklə güc nümayiş etdirmək imkanından ibarətdir. "Və cəlb olunduğunuz münaqişə zamanı bu bazaların bəzilərinə çıxışınız bağlananda, bu dəyərin ABŞ üçün hələ də qalıb-qalmadığı barədə sual edirsiniz", - deyə Rubio vurğulayıb.
"Bunu müzakirə etmək lazım gələcək, buna heç bir şübhə yoxdur", - deyə Dövlət katibi qeyd edib. Bundan əlavə, o əmindir ki, NATO üzvlərinin kollektiv razılaşmalara uyğun olaraq hərbi xərclərini hansı dərəcədə artırması məsələsinə də baxılmalıdır.
