Kitablara qayıdış: İsveç məktəbləri rəqəmsal təhsildən imtina edir
İsveç hökuməti məktəblərdə planşet və kompüter istifadəsini azaldaraq, fiziki kitab, kağız və qələmə qayıdışı əsas götürən yeni təhsil siyasəti həyata keçirir.
AFN.az xəbər verir ki, təhsil səviyyəsindəki geriləməni dayandırmağı hədəfləyən bu yanaşma, xüsusilə kiçik yaş qruplarında ekran istifadəsini tamamilə dayandırmağı nəzərdə tutan "ekrandan cildə" şüarı ilə idarə olunur.
Hökumət 2019-cu ildə məcburi edilən məktəbəqədər rəqəmsal təhsil şərtini ləğv edərkən, iki yaşından kiçik uşaqlara planşet verilməsini də qadağan edib. Məktəblərə dərslik alınması üçün təxminən 200 milyon dollarlıq nəhəng büdcə ayrılıb və mobil telefonların tamamilə qadağan edilməsi qərara alınıb.
Neyrobioloqlar ekranların siniflərdə diqqəti ciddi şəkildə dağıtdığını və rəqəmsal cihazlardan oxumağın məlumatın mənimsənilməsini çətinləşdirdiyini bildirərək bu qərarı dəstəkləyirlər. Digər tərəfdən, bəzi pedaqoqlar bu analoq qayıdışın tələbələri gələcəyin rəqəmsal işçi qüvvəsinə hazırlıqsız qoyacağı ilə bağlı narahatlıqlarını ifadə edirlər.
İsveçdə texnologiya nəhənglərinin çoxluq təşkil etməsi səbəbindən İT səriştəsinin azalmasının ölkə iqtisadiyyatına zərər verə biləcəyi barədə xəbərdarlıqlar edilir. İqtisadi Əməkdaşlıq və İnkişaf Təşkilatının (OECD) rəsmiləri isə texnologiyanın siniflərə pedaqoji plan olmadan daxil edilməsinin İsveçin PISA ballarını aşağı salmış ola biləcəyini qeyd ediblər.
