Yaponiya Rusiya və Şimali Koreyaya qarşı sanksiyaları nəzərdən keçirir
Yaponiya hökuməti Rusiya Federasiyası ilə KXDR arasında iddia edilən hərbi əməkdaşlığa görə əlavə sanksiyalar tətbiq etməyi düşünür.
AFN.az-ın xəbərinə görə, bu barədə ölkənin xarici işlər naziri Takeşi İvaya məlumat verib.
“Yaponiya Rusiya və Şimali Koreya arasında hərbi əməkdaşlıqla bağlı əlavə sanksiyaları nəzərdən keçirir. Tokio bu cür hərəkətləri ABŞ və digər ölkələrlə koordinasiyalı şəkildə həyata keçirir. Sanksiya tədbirlərinin təfərrüatları hazırlanır və daha sonra açıqlanacaq" - deyə nazir bildirib.
İvaya əlavə edib ki, dekabrın 16-da bir sıra dövlətlərin Xarici İşlər Nazirliyinin rəhbərləri ilə birlikdə Rusiya Federasiyası və KXDR-i tənqid edən bəyanata qoşulub. Eyni zamanda ABŞ və Cənubi Koreya yeni sanksiyalar tətbiq edib. Yaponiya Xarici İşlər Nazirliyinin rəhbəri Rusiya Federasiyası ilə KXDR arasında əməkdaşlığın nəinki Ukraynadakı vəziyyəti pisləşdirdiyini, həm də Yaponiyanın ətrafındakı təhlükəsizlik vəziyyətinə təsir etdiyini vurğulayıb. Bu günə qədər Yaponiya artıq ixrac və idxal məhdudiyyətləri, habelə fiziki şəxslərin və təşkilatların aktivlərinin dondurulması da daxil olmaqla bir sıra məhdudlaşdırıcı tədbirlər tətbiq edib.
