ABŞ hökuməti gəmi qəzasına görə 102 milyon dollar təzminat alacaq
Sinqapurda yerləşən "Grace Ocean" və "Synergy Marine" şirkətləri mart ayında Baltimorda 6 nəfərin ölümünə səbəb olan körpünün uçması ilə bağlı ABŞ hökuməti ilə əldə etdikləri razılaşma nəticəsində 102 milyon dollar təzminat ödəyəcək.
ABŞ Ədliyyə Nazirliyindən verilən açıqlamada "Francis Scott Key"in çökməsinə səbəb olan faciəvi qəzadan sonra federal hökumətin təmizləmə işlərinin dəyərini Amerika vergi ödəyicilərinin üzərinə qoymamaq üçün gəmi operatorlarının bu ödənişi qəbul etdiyi bildirilib.
Bu qəza ABŞ-da son illərin ən böyük nəqliyyat fəlakətlərindən biri hesab olunur.
Sentyabr ayında Ədliyyə Departamentinin açdığı iddiada "Dali" adlı gəminin sahibi və operatorları gəmidəki elektrik problemlərinə məhəl qoymamaqda günahlandırılıb.
İddiada gəminin mexaniki və elektrik sistemlərinin pis vəziyyətdə saxlanılması, gəminin gücünü itirməsinə, kursdan çıxmasına və körpüyə çırpılmasına səbəb olduğu iddia edilirdi.
Bu toqquşma körpünün böyük hissəsinin çaya düşməsinə səbəb olub, tikintidə çalışanlardan 6 nəfər həlak olub.
Qəza zamanı körpüdə işləyən bütün komanda daha yaxşı iş şəraiti və imkanları üçün ABŞ-a köçmüş Latın Amerikalı immiqrantlardan ibarət idi.
Ailələr xüsusilə miqrant işçilər üçün daha güclü işçi təhlükəsizlik tədbirlərini tələb edirlər.
Federal məmurlar qəzadan sonra sualtı qalıqları təmizləmək və Baltimor limanını yenidən açmaq üçün 100 milyon dollardan çox xərcləyiblər. Qəzadan sonra liman yalnız iyun ayında ticarət gəmilərinin hərəkətinə tam olaraq açılıb.
Bu müqavilə körpünün yenidən qurulması xərclərini ödəmir. Merilend ştatı körpünün sahibi olduğu və onu idarə etdiyi üçün ştat rəsmiləri bu zərərin ödənilməsi üçün ayrıca iddia qaldırıblar.
Yenidənqurma xərclərinin 1,7 ilə 1,9 milyard dollar arasında olacağı gözlənilir və körpünün təmirinin 2028-ci ilin payızında tamamlanması planlaşdırılır.
Mənbə: The Guardian
