Cənubi Koreya Ukraynaya aşağı faizli kreditlər verəcək
Cənubi Koreya İqtisadi İnkişaf Əməkdaşlıq Fondu (EDCF) Layihəsi çərçivəsində Rusiya ilə müharibə vəziyyətində olan Ukraynaya aşağı faizli kreditlərin verilməsi üçün çərçivə sazişi imzalayıb.
Yonhapdakı xəbərə görə, Cənubi Koreya İqtisadiyyat və Maliyyə Nazirliyindən verilən açıqlamada, G20 Maliyyə Nazirləri və Mərkəzi Bank Rəhbərləri Toplantısı çərçivəsində ABŞ-da olan nazir Çoi Sanq-mok və ukraynalı həmkarı Serhiy Marçenkonun Vaşinqtonda aşağı faizli kredit proqramları üçün müqavilə imzaladığı bildirilib.
Bəyanatda imzalanan sazişin kredit dəstəyi üçün hüquqi baza yaradacağı vurğulanıb və iki ölkənin Ukraynanın yenidən qurulması və inkişafına kömək edəcək layihələri ortaya çıxarmaq barədə razılığa gəldiyi qeyd edilib.
Bu razılaşma Cənubi Koreyanın Ukraynaya verdiyi 2,1 milyard dollar aşağı faizli kreditin yolunu açıb.
Cənubi Koreya 2023-cü ilin sentyabrında Ukraynaya 2,3 milyard dollar yardım vəd edib. Dəstəyin 200 milyon dollarının Ukraynanın ehtiyaclarını qarşılamaq üçün humanitar yardım olaraq göndəriləcəyini açıqlayan Seul rəhbərliyi, qalan 2,1 milyard dolların 2025-ci ildən başlayaraq İnkişaf Əməkdaşlıq Fondu (EDCF) Layihəsi çərçivəsində aşağı faizli və uzunmüddətli kreditlər şəklində veriləcəyini açıqlayıb.
