Almaniyada avtobus qəzası nəticəsində 27 məktəbli xəsarət alıb
Almaniyanın qərbində məktəb avtobusunun aşması nəticəsində 27 yeniyetmə yaralanıb.
Bu barədə aprelin 21-də gündəlik Bild qəzeti polisə istinadən yazıb.
Hadisə səhər saatlarında baş verib. Avtobusda əsasən 15-17 yaşlı oğlan və qızlardan ibarət 75 sərnişin olub. Onlar və onları müşayiət edən bir neçə şəxs Marburqdan İngiltərəyə gedirmişlər. Almaniyanın Olpe şəhəri yaxınlığında avtomobil yoldan çıxaraq aşıb.
Qəzetin yazdığına görə, ümumilikdə qəza nəticəsində 27 yeniyetmə xəsarət alıb, onlardan 4-ü ağır yaralanıb və xəstəxanaya yerləşdirilib. Avtobus sürücüsü isə yüngül xəsarətlər alıb.
Polis qəzanın baş vermə səbəblərini araşdırır.
