İsveçrə XİN Rusiyanın Ukraynadakı sülh prosesində iştirakının lehinə çıxış edib
İsveçrə müxtəlif fikirləri nəzərə alaraq və Rusiyanı sülh prosesinə daxil etməklə Ukraynada sülhə gedən yolların tapılmasına inklüziv yanaşmanın tərəfdarıdır.
Bu barədə TASS-a İsveçrə Xarici İşlər Nazirliyinin rəsmi nümayəndəsi Pyer Alen Elçinqer bildirib.
“İsveçrə üçün ədalətli dünyaya mümkün yolda müxtəlif baxış və təklifləri birləşdirmək son dərəcə vacibdir”, - deyə o, TASS-ın müxbirinin Bernin Ukrayna ilə bağlı daha əvvəl təşkil etməyi planlaşdırdığı konfransa hazırlığı ilə bağlı sualını cavablandırarkən bildirib: “Ukrayna, Rusiya, Avropa və Şimali Amerikanın fikirlərinə əlavə olaraq, atəşkəs və sülh razılaşmasına yol tapmaqda mühüm rol oynayan qlobal Cənuba qulaq asmaq və nəhayət Rusiyanı bu prosesə daxil etmək xüsusilə vacibdir”.
Elçinqerin sözlərinə görə, İsveçrə Xarici İşlər Nazirliyi yalnız Qərb ərazisindən kənara çıxan inklüziv yanaşmaya riayət edir. “İsveçrə diplomatik aparatının bu yanaşması sülhə gətirib çıxara biləcək konstruktiv prosesin başlanmasına yönəlib. Bu proses son nəticədə Rusiyanın dinc dinamikada iştirakını təmin etməlidir" - deyə o bildirib.
Elçinqer TASS-ın İsveçrənin Rusiyanı hazırda hazırladığı Ukrayna ilə bağlı konfransa dəvət edib etməyəcəyi ilə bağlı sualına birbaşa cavab verməyib. Rəsmi nümayəndə qeyd edib ki, qarşıdan gələn konfrans İsveçrənin xarici işlər naziri İqnazio Kassisin bütün görüş və səfərlərinin mərkəzi mövzusudur. Onun sözlərinə görə, digər isveçrəli diplomatlar da hazırda əsas ölkələrlə danışıqlarda sülh konfransı və ya real sülh prosesini mümkün etmək üçün zəruri və müvafiq əsasların nə olduğunu araşdırırlar. "Xüsusilə, İsveçrə Xarici İşlər Nazirliyinin dövlət katibi Aleksandr Fasel bu ölkənin prezidenti və xarici işlər nazirliyi ilə bu məsələləri müzakirə etmək üçün bu həftə Braziliyadadır" - deyə Elçinqer əlavə edib.
