Baş katib Ukraynanın NATO üzvü olacağına əmindir
Alyansın baş katibi Yens Stoltenberq bildirib ki, Ukrayna NATO-ya üzv olacaq.
“Müttəfiqlər Ukraynanın NATO-ya üzv olacağına razıdırlar. NATO-Ukrayna görüşündə biz ukraynalılar üçün tövsiyələr üzərində razılaşacağıq... Biz Kiyevi NATO-ya üzvlük yolunda dəstəkləməyə davam edəcəyik. Bununla belə, bütün müttəfiqlər razılaşır ki, Ukrayna və NATO-nu yaxınlaşdırmaq üçün səylər davam etsə də, müharibənin ortasında tam üzvlük qeyri-mümkün olaraq qalır” - deyə o bildirib.
Baş katib əlavə edib ki, bu ay Almaniya və Hollandiya Ukraynaya 10 milyard avro ayırmağa söz veriblər. Rumıniya ukraynalı F16 pilotları üçün təlim mərkəzi açıb. Müttəfiqlər, o cümlədən ABŞ və Finlandiya Ukrayna şəhərlərini qorumaq üçün əlavə hava hücumundan müdafiə sistemləri və sursat göndərir.
Stoltenberq həmçinin İsveçin yaxınlaşan NATO üzvlüyünün "hamımızı daha təhlükəsiz edəcəyini" deyib. O, Türkiyə və Macarıstanı ratifikasiya prosesini başa çatdırmağa çağırıb.
Baş katib bildirib ki, Ukrayna özü bu müharibəni dayandırmaq üçün hansı üsulların onun üçün məqbul olduğuna qərar verməlidir: “Bizim məsuliyyətimiz Ukraynanı dəstəkləmək və ona mümkün qədər çox torpaq azad etmək imkanı verməkdir ki, danışıqlar başladıqda və ya başlasa, əlverişli vəziyyətdə olsun... Müharibələr təbiətinə görə gözlənilməzdir. Prezident Putinin sülh planlaşdırdığına dair heç bir əlamət görmədik, əslində o, yeni müharibə planlaşdırır. Biz dəqiq bilirik ki, Ukraynaya nə qədər çox hərbi dəstək versək, onun döyüş meydanındakı mövqeyi bir o qədər möhkəmlənəcək və potensial danışıqlar masasında mövqeyi bir o qədər möhkəm olacaq”.
