Fırtına təhlükəsi ilə bağlı Floridada fövqəladə vəziyyət elan edilib
ABŞ prezidenti Co Bayden yaxınlaşan "İdalia" qasırğasının mümkün fəsadları ilə əlaqədar Florida ştatında fövqəladə vəziyyət elan edilməsi qərarını təsdiqləyib.
Ağ Evdən verilən yazılı açıqlamada, Baydenin 27 avqust 2023-cü il tarixindən etibarən İdalia Tropik Fırtınası ilə əlaqədar fövqəladə vəziyyətlər səbəbiylə əyalət, qəbilə və yerli reaksiya səylərini dəstəkləmək üçün federal yardım əmrini təsdiqlədiyi bildirilib.
"Prezidentin bu qərarı Daxili Təhlükəsizlik Departamentinin Federal Fövqəladə Halların İdarə Olunması Agentliyinə (FEMA) bütün fəlakətlərə kömək səylərini koordinasiya etmək və fövqəladə vəziyyətin yerli sakinlərə gətirdiyi sıxıntı və əziyyətləri azaltmaq üçün lazımi yardım göstərmək səlahiyyətini verir" - deyə açıqlamada qeyd edilib.
Fövqəladə vəziyyət insanların həyatını xilas etməyə, əmlakı, əhalinin sağlamlığını və təhlükəsizliyini qorumağa, Florida ştatının fırtınadan ən çox təsirlənəcək əyalətlərində fəlakət təhlükəsini azaltmağa və ya qarşısını almağa kömək edəcək.
ABŞ-da 2024-cü ildə keçiriləcək prezident seçkilərində Respublikaçılar Partiyasından namizəd olan Florida qubernatoru Ron DeSantis qasırğaya çevrilə biləcək fırtına səbəbindən seçki kampaniyasını yarımçıq qoyub.
Təşviqat qrupu vasitəsilə paylaşılan elanda DeSantis, əyalətdə qarşıdan gələn fəlakətə hazırlaşmaq üçün seçki kampaniyası üzərində işi dayandırdığını bildirdi.
"İdalia" qasırğasının çərşənbə günü, avqustun 30-da Florida sahillərinə çatacağı gözlənilir.
