“Xanun” tropik qasırğası yenidən Yaponiyaya yaxınlaşır: təhlükəli yağış xəbərdarlığı edilib
Yaponiyanın cənub-qərbində güclü fırtına və bir neçə gün eyni bölgəyə yağan güclü yağışdan sonra təhlükəli leysan yağışları ilə bağlı yeni xəbərdarlıqlar edilib.
"Associated Press" Yaponiya Meteorologiya Agentliyinə istinadən xəbər verir ki, "Xanun" tropik qasırğası Okinava adalarının ən cənub qrupuna qayıdır, yavaş-yavaş şimala doğru irəliləyir və küləyin sürətini saniyədə 30 metrə qədər artırır.
Okinavanın baş naziri Denni Tamaki sakinlərə şiddətli yağışlara və sürüşmələrə hazırlaşmaq barədə xəbərdarlıq edib.
"Bu o demək ola bilər ki, yaşadığınız ərazini vurmaq üzrə olan təhlükələr qeyri-adi və əvvəllər heç vaxt yaşamadığınız miqyasdadır" - deyə baş nazir bildirib.
Bildirilir ki, fırtına keçən həftə eyni bölgəni vurub, 2 nəfərin ölümünə və onlarla insanın yaralanmasına səbəb olub. Bundan əlavə, on minlərlə evdə elektrik enerjisi müvəqqəti olaraq kəsilib.
Sinoptiklər fırtınanın sərgərdan yolunun qeyri-adi olduğunu və yavaş-yavaş hərəkət etdiyini, güclü külək və güclü yağışla geniş əraziyə təsir etdiyini söyləyiblər.
Yaponiya Meteorologiya Agentliyinin verdiyi məlumata görə, fırtınanın şimala doğru hərəkətini davam etdirəcəyi və ehtimal ki, çərşənbə və ya cümə axşamı Yaponiyanın cənubundakı Kyuşu adasını vuracağı gözlənilir.
