Avropada enerji böhranı: Belçika 2 nüvə reaktorunun istismar müddətini uzadıb
Belçika enerji şirkəti “Engie” ilə daha əvvəl dayandırılması planlaşdırılan "Tihange 3" və "Doel 4" nüvə reaktorlarının işləmə müddətinin 10 il uzadılması ilə bağlı razılığa gəlib.
AFN.az xarici mediaya istinadən xəbər verir ki, Belçikanın Baş naziri Alexander De Croo Nazirlər Şurasının iclasından sonra mətbuata açıqlama verib. “Engie” şirkəti ilə ölkədəki “Tihange 3” və “Doel 4” reaktorlarının işləmə müddətinin daha 10 il uzadılmasına dair razılaşma əldə edildiyini bildirən De Croo, “Bu iki nüvə reaktorunun fəaliyyət müddətinin uzadılması enerji təhlükəsizliyimiz üçün çox vacibdir” deyib. Razılaşmaya əsasən, iki reaktor Belçika dövləti ilə “Engie” arasında birgə müəssisə olacaq struktur tərəfindən idarə ediləcək. Nüvə tullantılarının xərclərini ödəmək üçün çərçivə yaradılacaq. Bu mərhələdən sonra ekoloji icazələrin alınması prosesi ilə bağlı texniki və maliyyə araşdırmaları aparılacaq.
Qeyd edək ki, Belçikada Hollandiya sərhədinə yaxın "Doel" AES-də 4, Almaniya və Lüksemburq sərhədinə yaxın "Tihange" AES-də 3 olmaqla ümumilikdə 7 reaktor var. Bu reaktorlar tərəfindən istehsal olunan elektrik enerjisi adətən ölkənin tələbatının təxminən yarısını ödəyir.
Belçikada əvvəlki hökumətlərin hazırladığı nüvəsizləşdirmə qanununa uyğun olaraq, ölkədə 40 ildir fəaliyyət göstərən "Doel 3" reaktoru sentyabr ayında bağlanıb və aktiv reaktorların sayı 6-ya endirilib. Son razılaşma ilə ölkənin 1985-ci ildə inşa edilən "Doel 4" və "Tihange 3" reaktorlarının istismar müddətləri daha 10 il uzadılacaq.
Rusiya-Ukrayna müharibəsindən əvvəl Belçika hökuməti 2025-ci ildə atom elektrik stansiyalarının fəaliyyətini dayandırmaq planı hazırlamışdı. Lakin Avropadakı müharibə və enerji böhranı səbəbindən Belçika bağlamağı planlaşdırdığı atom elektrik stansiyalarının istismar müddətini 10 il uzatmaq qərarına gəlib.
Leyla
