Komitə qadağa qoysa da, ATV-nin keçmiş prezidenti əməl etmir - FOTOLAR
Tanınmış iş adamı Hacı İbrahim Nehrəmlinin qardaşı, ATV-nin keçmiş prezidenti Tağı İbrahimovun şirkəti Dövlət Şəhərsalma və Arxitektura Komitəsinin qadağasına baxmayaraq qanunsuz bina tikintisini davam etdirir.
"Qafqazinfo”ya müraciət edən bir qrup sakin bildirib ki, T.İbrahimovun təsisçisi olduğu, oğlu Elşən İbrahimovun faktiki rəhbərlik etdiyi "Nehrəm” MTK Nərimanov rayonu, Həsən Əliyev küçəsi 33, məhəllə 945-də inşa etdiyi 19 mərtəbəli binanın 4 metrliyində yeni 18 mərtəbəli bina tikir. İnşaat şirkəti binaların yanğın təhlükəsizliyini təmin etmir, tikintidə təhlükəsizlik qaydalarına əməl olunmur, kommunal xətlərin çəkilişi normalara cavab vermir. Yaşadıqları bina 14 ildir inşa olunsa da, sakinlər çıxarışla təmin edilməyib.
Şikayətçilər bildirib ki, yeni binanın inşasını "Kon-Lay Project" MMC həyata keçirir. Şirkətin rəhbəri isə Nofəl adlı keçmiş polis işçisidir. Lakin tikintiyə "Nehrəm” MTK tərəfindən Şahlar adlı şəxs vasitəsilə nəzarət edilir.
Binanın cəmi 4 metrliyində 2 bloklu, 18 mərtəbəli bina tikilməsinə Dövlət Şəhərsalma Komitəsinin müavini Dövlətxan Dövlətxanov icazə verib. Sakinlər bununla bağlı həm tikintini həyata keçirən şəxslərə, həm də müvafiq məsul dövlət qurumlarına şikayət edərək etirazlarını bildirsələr də, hələ də binanın tikintisi davam edir.
Şikayəti araşdırmaq üçün Dövlət Şəhərsalma və Arxitektura Komitəsi ilə əlaqə saxladıq. Komitədən "Qafqazinfo”ya bildirildi ki, bu barədə sakinlərdən şikayət daxil olub: "Həmin şikayət araşdırılıb və müəyyən edilib ki, ərazidə layihə üzrə nəzərdə tutulmayan 18 mərtəbəli bina tikintisi həyata keçirilir. Həmin layihə, o cümlədən onun baş planı üzrə tikinti aparılması qeyri-mümkündür”.
Məsələ ilə bağlı "Nehrəm” MTK ilə əlaqə saxlamağa çalışsaq da, şirkətə məxsus məlumatları tapa bilmədik. Məlum oldu ki, paytaxtda çoxmərtəbəli binalar inşa edən bu şirkətin nəinki saytı, heç əlaqə vasitələri belə yoxdur. "Kon-Lay Project” MMC-dən isə onların tikinti şirkəti olmadıqlarını, "Nehrəm” MTK-ya məxsus hazır binada dizayn işlərini həyata keçirdiklərini dedilər. Şirkətdən, həmçinin bildirdilər ki, yeni tikilən bina ilə ümumiyyətlə, əlaqələri yoxdur.
