Votsap hindistanlı sahibkara əmanət edildi
Təxminən yeddi ildir ki, Votsap-a rəhbərlik edən Uill Katkart vəzifəsindən ayrılmaq qərarı alıb, tətbiqin yeni lideri isə Hindistanın maliyyə texnologiyaları startapı "Cred"in təsisçisi Kunal Şah olub.
AFN.az xəbər verir ki, dünyanın ən populyar mesajlaşma platforması Votsap-ın baş direktoru Uill Katkart vəzifəsini tərk edəcəyini açıqlayıb.
Təxminən yeddi ildir "Meta" şirkətinin tərkibindəki platformanı idarə edən və tətbiqin gizli çat funksiyalarını dünya miqyasında 3 milyarddan çox istifadəçiyə çatdıran Katkart sosial media vasitəsilə etdiyi açıqlamada platformanın tarixinin ən güclü mövqeyində olduğunu və ayrılmaq üçün doğru zamanı seçdiyini bildirib.
Vəzifəsindən ayrılan Katkartın Meta rəhbərliyində fərqli bir rol icra etməyə davam edəcəyi qeyd olunarkən, boşalan posta isə Hindistan mərkəzli fintex startapı "Cred"in təsisçisi Kunal Şahın gətiriləcəyi elan edilib.
Meta-nın baş direktoru Mark Zükerberq bu strateji rəhbərlik dəyişikliyi haqqında etdiyi açıqlamada Kunal Şahın Hindistanın ən mühüm texnologiya şirkətlərindən birini qurduğunu vurğulayıb.
Şahın qlobal bir baxış bucağına və yenilikçi istehsalçı məntiqinə sahib olduğunu qeyd edən Zükerberq bu xüsusiyyətlərin dünyanın ən böyük mesajlaşma tətbiqini idarə edərkən ona böyük töhfə verəcəyini ifadə edib.
Zükerberq milyardlarla insan və milyonlarla biznes üçün Votsap-ı ən yaxşı xidmətə çevirmək naminə yeni liderlə birlikdə işləməyi səbirsizliklə gözlədiyini sözlərinə əlavə edib.
Yeni lider Kunal Şah Votsap-ın rəhbərliyinə keçərkən təsisçisi olduğu "Cred" şirkətindəki səhmdar statusunu qoruyacağını açıqlayıb.
Bu rəhbərlik dəyişikliyi ilə eyni vaxtda Meta Şahın Benqaluru mərkəzli şirkəti "Cred"ə 900 milyon dollarlıq investisiya qoyaraq şirkətin 20 faizlik səhminə şərik olub.
Şirkətlərin məlumat paylaşımı məsələsində həssas yanaşdığını bildirən Şah Meta-nın azlıq təşkil edən investor kimi "Cred"in tərkibinə daxil olduğunu, lakin istifadəçi məlumatlarına heç bir şəkildə çıxış əldə edə bilməyəcəyini dəqiq bir dillə ifadə edib.
Votsap rəhbərliyindəki bu köklü dəyişiklik Meta-nın tətbiqin onsuz da ən güclü olduğu Hindistan bazarındakı mövqeyini daha da möhkəmləndirmək addımı kimi qiymətləndirilir.
Təxminən 853 milyon istifadəçi ilə Hindistan Votsap-ın dünyadakı ən böyük bazarını təşkil edir.
Meta son dövrlərdə reklamlar, ödənişli abunəliklər və süni intellekt alətləri ilə bu platforma üzərindən əldə etdiyi gəlirləri artırmağı hədəfləyərkən, digər tərəfdən də ölkədə məlumat paylaşımı və məxfilik siyasəti səbəbindən qarşılaşdığı hüquqi araşdırmaları dəf etməyi məqsəd qoyur.
