İngiltərədə polisə qarşı süni intellektlə saxta sübut araşdırması
İngiltərədə bir polis nəfəri məhkəmə işlərində sübut yaratmaq məqsədilə süni intellektdən istifadə etməkdə ittiham olunaraq işdən kənarlaşdırılıb.
AFN.az xəbər verir ki, ölkədə bir ilk olan hadisədə sözügedən əməkdaş barəsində ədalət mühakiməsinə mane olmağa cəhd maddəsi ilə məhkəmə və inzibati araşdırma başladılıb.
Derbişir Polis İdarəsində çalışan və şəxsiyyəti açıqlanmayan polis nəfərinin baxdığı bəzi işlərdə süni intellekt sistemlərindən yararlanaraq saxta sübutlar yaratmaqda ittiham olunduğu və aparılan cinayət təhqiqatı çərçivəsində aktiv vəzifəsindən uzaqlaşdırıldığı bildirilib.
Polis rəsmiləri məhkəmə prosesinə mənfi təsir göstərə biləcək bu vəziyyətlə bağlı İngiltərə Kral Prokurorluq Xidməti ilə birgə işə başladıqlarını qeyd ediblər.
Araşdırmanın hələ ilkin mərhələdə olduğu və indiyə qədər heç bir saxlama qərarının icra edilmədiyi öyrənilib.
Kral Prokurorluq Xidməti də mövzu ilə bağlı açıqlama verərək hüquq-mühafizə orqanları ilə sıx təmasda olduqlarını təsdiqləyib və süni intellektin daxil edildiyi iddia olunan işlərdəki müdafiə tərəfi və məhkəmələrlə əlaqə saxlanıldığını bildirərək, istintaqın gedişatı baxımından əlavə təfərrüat paylaşmaqdan çəkinib.
Digər tərəfdən, bu qalmaqal İngiltərə polis təşkilatlarında süni intellektin istifadəsinin etibarlılığı barədə müzakirələri yenidən alovlandırıb.
Milli Polis Rəisləri Şurasının Süni İntellekt Mərkəzinin rəhbəri Aleks Mürrey yaxın vaxtlarda bir çox polis idarəsinə məhkəmə ifadələri hazırlayarkən və ya bənzər kritik tapşırıqlarda süni intellektdən istifadəni dayandırmaq barədə təlimat verdiklərini açıqlayıb.
Mürrey bu növ sistemlərin hələlik məhkəmə proseslərində təhlükəsiz şəkildə tətbiq ediləcək qədər etibarlı olmadığını vurğulayıb.
Bununla belə, İngiltərə polisi süni intellektdən öz daxilindəki sui-istifadə hallarını aşkarlamaq üçün də yararlanır.
Ötən aprel ayında London Metropoliten Polisi təşkilat daxilindəki qanunsuzluqları və korrupsiyanı üzə çıxarmaq məqsədilə xüsusi bir süni intellekt proqramını işə salıb.
Bir həftə davam edən yoxlamalar nəticəsində evdən işləmək qaydalarının pozulmasından rüşvətə, hətta ağır cinayət iddialarına qədər uzanan yüzlərlə sənəd araşdırılıb.
Bu əməliyyat nəticəsində vəzifə səlahiyyətlərindən sui-istifadə və dələduzluq kimi ağır cinayətlərdə əli olduğu müəyyən edilən üç polis nəfəri həbs olunub.
