"Canvas" proqramına kiberhücum: Minlərlə universitet təsirə məruz qaldı
Dünya miqyasında minlərlə təhsil müəssisəsinin istifadə etdiyi "Canvas" öyrənmə idarəetmə sistemi genişmiqyaslı kiberhücumun hədəfi olub.
AFN.az xəbər verir ki, finalların yaxınlaşdığı kritik bir dövrdə sistemin oflayn qalması təhsil dünyasında böyük xaosun yaranmasına səbəb olub.
"Emsisoft" kiber-təhlükəsizlik firmasının təhdid analitiki Lyuk Konnolli hücumun arxasında "ShinyHunters" adlı haker qrupunun dayandığını bildirib.
Qrupun iddialarına görə, dünya üzrə təxminən 9 min məktəb bu hücumdan zərər çəkib, həmçinin milyardlarla şəxsi mesaj və tələbə qeydləri ələ keçirilib.
Hakerlər məlumatları sızdırmamaq üçün 12 may tarixinə qədər vaxt qoyaraq fidyə tələb ediblər.
Hücum səbəbindən ABŞ-ın Harvard, "Virginia Tech", Ayova Universiteti kimi nüfuzlu təhsil ocaqları sistemin bağlandığını təsdiqləyib.
Tələbələr dərslik materiallarına, mühazirə videolarına və tapşırıq portallarına daxil ola bilmirlər, bu səbəbdən universitet rəhbərlikləri final imtahanları və semestr sonu fəaliyyətləri üçün əlavə təlimatlar paylaşacaqlarını elan ediblər.
Mütəxəssislər xəbərdarlıq edir ki, sözügedən haker qrupu keçmişdə "Ticketmaster" kimi nəhəng şirkətlərə qarşı hücumlarla da tanınır və ələ keçirilən şəxsi məlumatlar gələcəkdə hədəfli fişinq hücumlarında istifadə edilə bilər.
"Canvas"ın ana şirkəti olan "Instructure" hələlik rəsmi açıqlama verməsə də, sistemin təhlükəsizlik məqsədilə bağlandığı, yoxsa hücum nəticəsində çökdüyü hələ tam dəqiqləşməyib.
Sektor nümayəndələri bu hadisənin təhsil müəssisələrinin texnologiyadan asılılığını və rəqəmsal məlumatların müdafiəsizliyini bir daha nümayiş etdirdiyini vurğulayırlar.
