ABŞ Konqresi uşaqlara süni intellekt çat-botlarını qadağan etməyə hazırlaşır
ABŞ Konqresində uşaqların süni intellekt əsaslı çat-botlara çıxışını məhdudlaşdırmağı hədəfləyən hüquqi proses sürətlənib.
AFN.az xəbər verir ki, Senatın Məhkəmə Komitəsi texnologiya şirkətlərinə yaşın təsdiqlənməsi öhdəliyi gətirən və yetkinlik yaşına çatmayanlara "süni intellekt dostu" təklif edilməsini qadağan edən qanun layihəsini yekdilliklə qəbul edib. "GUARD" Aktı adlandırılan tənzimləmə süni intellekt alətlərinin insan olmadığını müəyyən fasilələrlə istifadəçilərə bildirməsini məcburi edir.
Layihə həmçinin uşaqları cinsi məzmunlu paylaşımlara və ya intihara təşviq edən süni intellekt sistemlərini hazırlayan şirkətlərə qarşı ağır cəza sanksiyaları nəzərdə tutur. Senatdakı məsələ ilə eyni vaxtda Nümayəndələr Palatasında da bənzər bir layihə gündəmə gətirilib. Millət vəkilləri uşaqların inkişafının rəqəmsal platformalar əvəzinə, real dünyadakı qarşılıqlı əlaqələrlə dəstəklənməli olduğunu vurğulayıblar.
Süni intellekt robotlarının uşaqların psixi sağlamlığı üzərindəki risklərinə diqqət çəkilərək, Konqresin bu məsələdə təcili hərəkətə keçməli olduğu ifadə edilib. Hazırda ChatGPT, Google Gemini və Meta AI kimi populyar platformalar 13 yaşdan yuxarı uşaqların xidmətlərdən istifadəsinə icazə verir. Lakin yeni tənzimləmə valideynlərin şikayətləri və istismar iddiaları fonunda bu qaydaları sərtləşdirir.
Sözügedən qanun layihəsi təhlükəsizlik yönümlü yanaşmasına baxmayaraq, məxfilik müdafiəçiləri tərəfindən tənqid olunur. Ekspertlər yaşın təsdiqlənməsi məcburiyyətinin şəxsi məlumatların məxfiliyini poza biləcəyi barədə xəbərdarlıq edirlər. Bəzi texnologiya şirkətləri isə rəqəmsal xidmətlərin konstitusiya ilə qorunan ifadə azadlığı çərçivəsində qiymətləndirilməli olduğunu iddia edirlər.
Qanunvericilər isə nəzarətsiz süni intellekt istifadəsinin uşaqlar üzərində çox ciddi fəsadlar yarada biləcəyi fikrində həmrəydirlər. Layihə qanunlaşacağı təqdirdə texnologiya nəhəngləri yetkinlik yaşına çatmayan istifadəçilərə yönəlmiş xidmət modellərini tamamilə dəyişməli olacaqlar.
