TikTok süni intellekt layihəsini sabotaj edən təcrübəçini işdən çıxarıb
TikTok-un sahibi "ByteDance", süni intellekt (AI) modellərindən birinin təliminə "zərərli müdaxilə" üçün bir təcrübəçini işdən çıxardığını açıqlayıb.
Hadisə həftə sonu sosial şəbəkələrdə yayılan xəbərlərlə gündəmə gəlib. Çin texnologiya nəhənginin ChatGPT-yə bənzər süni intellekt çatbotu olan Doubao ölkədə ən populyar süni intellekt proqramlarından biri kimi tanınır.
Mövzu ilə bağlı "ByteDance"dən bildirilib ki, sözügedən şəxs reklam texnologiyası komandasında təcrübəçi olub və süni intellekt laboratoriyası ilə bağlı heç bir təcrübəsi olmayıb. Açıqlamada təcrübəçinin sosial şəbəkədəki profilində və bəzi KİV-də yayılan məlumatların yanlış olduğu da vurğulanıb.
Şirkətdən bildirilib ki, onun kommersiya onlayn əməliyyatları və böyük dildə AI modelləri təcrübəçinin hərəkətlərindən təsirlənməyib.
