Pentaqon və "Google" arasında kritik süni intellekt müqaviləsi
Pentaqon "Google"un güclü süni intellekt sistemi olan "Gemini"ın məxfi şəbəkələrdə istifadə edilməsi üçün texnologiya nəhəngi ilə razılığa gəlib.
AFN.az xəbər verir ki, ABŞ-ın müdafiə naziri Pit Heqsetin ordunu süni intellekt prioritetli döyüş qüvvəsinə çevirmək hədəfi çərçivəsində imzalanan bu müqavilə "Google"u "OpenAI" və "xAI" kimi nəhənglərin sırasına daxil edib.
Pentaqon son aylarda ABŞ-ın ən böyük dörd süni intellekt şirkəti ilə sistemlərin hər hansı qanuni məqsədlə istifadəsinə icazə verən yeni müqavilələr imzalamağa çalışırdı. İyul ayında "Google", "OpenAI", "Anthropic" və "xAI" ilə başlayan kəşfiyyat xarakterli təmaslar artıq "Google" və "OpenAI" ilə rəsmi müqavilələrə çevrilib.
"Google" hazırda məxfi olmayan sistemlərdə orduya xidmət göstərirdi, lakin yeni razılaşma "Gemini"ın kəşfiyyat analizi və hədəf müəyyənləşdirmə kimi daha kritik və gizli əməliyyatlarda istifadəsinə yol açır.
Müqavilə prosesi sektorun digər iştirakçısı olan "Anthropic" ilə yaşanan gərginliyin kölgəsində qalıb. "Anthropic" şirkətinin rəhbəri Dario Amodeinin süni intellektin kütləvi izləmə və ya öldürücü avtonom silahların idarə edilməsi üçün istifadə edilməyəcəyinə dair güclü zəmanət tələbləri Pentaqon tərəfindən rədd edilib.
Nazir Heqsetin "Anthropic"i milli təhlükəsizlik riski elan etməsi və Prezident Trampın federal qurumların bu şirkətin məhsullarından istifadə etməsini qadağan etməsindən sonra məsələ məhkəməyə daşınıb.
"Google" isə "OpenAI" kimi qanuni istifadə bəndini qəbul edərək bənzər bir ictimai qarşıdurmadan yayınmağı bacarıb.
"Google" rəhbərliyi Pentaqon ilə razılığa gəlsə də, şirkət daxilində narazılıqlar davam edir. Təxminən 600 "Google" əməkdaşı icraçı direktor Sundar Piçaya məktub göndərərək yeni hərbi tərəfdaşlıqlardan imtina edilməsini tələb edib.
2018-ci ildə "Project Maven" çərçivəsində yaşanan bənzər etiraz dalğası "Google"un həmin dövrdə hərbi layihələrdən geri çəkilməsinə səbəb olmuşdu.
"Google"un rəsmi nümayəndəsi Keyt Dreyer süni intellektin lazımi insan nəzarəti olmadan kütləvi izləmə və ya avtonom silahlanma üçün istifadə edilməməsi ilə bağlı etik öhdəliklərinə sadiq qaldıqlarını vurğulasa da, məxfi şəbəkələrdəki istifadənin nə dərəcədə nəzarət edilə biləcəyi vətəndaş cəmiyyəti təşkilatları arasında narahatlıq yaratmağa davam edir.
