Google-un rəhbəri xəbərdarlıq etdi: Məlumata kor-koranə etibar etməyin
Google-un ana şirkəti Alphabet-in baş direktoru Sundar Piçay bildirib ki, süni intellekt alətləri tərəfindən verilən bütün məlumatlara kor-koranə etibar edilməməlidir. Piçay mövcud süni intellekt modellərinin səhv etməyə meylli olduğunu bildirib və istifadəçilərin bu alətləri digər mənbələrlə birlikdə qiymətləndirməli olduqlarını vurğulayıb.
Piçay informasiya ekosisteminin zənginliyinin vacibliyini vurğulayaraq, "Buna görə də insanlar Google axtarışından da istifadə edirlər. Dəqiq məlumat verməyə yönəlmiş müxtəlif məhsullarımız var" deyib. O, süni intellektin yaradıcı kopiraytinq kimi sahələrdə faydalı olduğunu, lakin istifadəçilərin bu alətlərdən düzgün məqsədlər üçün istifadə etməyi öyrənməli və onların dediklərinə tamamilə etibar etməməli olduğunu qeyd edib.
O, "Ən dəqiq məlumatı təmin etmək üçün çox çalışırıq, lakin mövcud süni intellekt texnologiyası səhv etməyə meyllidir" deyib. Texnologiya dünyası Google-un istehlakçıya yönəlmiş süni intellekt modelinin Gemini 3.0-ın satışa çıxarılmasını gözləyir. Model ChatGPT-yə qarşı bazar payını geri almağa başlayıb.
Google may ayından etibarən axtarış sisteminə "AI Mode" adlı yeni süni intellekt söhbət xüsusiyyətini inteqrasiya edib. Piçay bu addımı AI platformasında yeni bir dövr adlandırıb. Şirkət ChatGPT kimi rəqib süni intellekt xidmətlərinə qarşı axtarış sistemindəki dominantlığını qorumağı hədəfləyir.
BBC-nin araşdırmasına görə, ChatGPT, Copilot, Gemini və Perplexity kimi çatbotlar xəbərləri ümumiləşdirərkən ciddi səhvlər edirlər. BBC məzmununun sınaqları bu vasitələrin cavablarının dəqiqliyi ilə bağlı ciddi problemləri ortaya qoyub.
Piçay texnologiyanın inkişaf tempi potensial zərərin qarşısını almaq üçün görülən tədbirlərdən geridə qala biləcəyini də bildirib. O, Alphabet üçün əsas məsələnin bu prosesi eyni zamanda cəsarətli və məsuliyyətli şəkildə idarə etmək olduğunu söyləyib.
Piçay süni intellekt təhlükəsizliyinə investisiyaların süni intellekt investisiyaları ilə mütənasib olaraq artdığını bildirib. İllər əvvəl İlon Maskın OpenAI təsisçilərinə Google-ın DeepMind-i satın almasının "Süni İntellekt diktaturası" yarada biləcəyi ilə bağlı narahatlıqlarını xatırladan Piçay "Süni İntellekt kimi güclü bir texnologiyanın tək bir şirkətin əlində olması doğru olmazdı" deyib.
Lakin o, bu gün çoxsaylı şirkətlərin süni intellekt sahəsində fəaliyyət göstərdiyini qeyd edərək, "Bu tehnоlogiyanı inkişaf etdirən tək bir şirkət olsaydı, mən də narahat olardım. Amma biz bundan çox uzaqdayıq" deyə əlavə edib.
