Starmerin evinə hücumda şübhəli bilinən üçüncü şəxs həbs edilib
London polisi, Böyük Britaniyanın baş naziri Keir Starmerin evini yandırmaqda şübhəli bilinən üçüncü şəxsi saxlayıb.
Bu barədə məlumatı “Reuters” hüquq-mühafizə orqanlarına istinadla yayıb.
Londonun terrorla mübarizə bölməsi tərəfindən araşdırılan iş üzrə 34 yaşlı şübhəli polis bölməsinə aparılıb və istintaq davam etdirilir.
Hadisə mayın 13-də Starmerə məxsus evdə yanğın baş verməsindən sonra gündəmə gəlib. Mayın 15-də Ukrayna vətəndaşı Roman Lavrinoviç bu iş üzrə ilk şübhəli şəxs kimi ittiham edilib və Londonun cənub-şərqindəki Sydenham şəhərində həbs olunub. O, ertəsi gün məhkəmə qarşısına çıxarılıb.
İkinci şübhəli şəxs isə mayın 17-də həbs edilib və ertəsi gün məhkəmə qarşısına çıxarılıb.
Polis orqanları istintaqın hərtərəfli davam etdirildiyini və ictimai təhlükəsizliklə bağlı zəruri tədbirlərin görüldüyünü açıqlayıb.
