Yeni doğulmuş körpələri öpmək niyə təhlükəli ola bilər?
İngiltərədə işləyən Dr. Karan Rac "TikTok"dakı paylaşımı ilə körpələri öpməyin təhlükələrinə diqqət çəkib. Sosial şəbəkələrdə minlərlə insan tərəfindən şərh edilən bu paylaşım bir çox insanın bu məsələdən xəbərsiz olduğunu üzə çıxarıb.
Böyük Britaniyada yerləşən Lullaby Trust keçən il apardığı sorğuda müəyyən edib ki, yeni valideynlərin 54 faizi dostlarına və ailə üzvlərinə infeksiya riskini bilmədən körpələrini öpməyə icazə verib.
Yeni doğulmuş körpənin immun sistemi tam inkişaf etmədiyi üçün infeksiyalara qarşı həssasdır. İlk üç aylıq körpələrin immun sistemləri böyüklərə nisbətən daha az infeksiyaya qarşı mübarizə aparan hüceyrələrə malikdir. Bu o deməkdir ki, böyüklərdə yüngül simptomlara səbəb olan infeksiyalar körpələrin həyatı üçün təhlükə yarada bilər.
Məsələn, herpes virus infeksiyası böyüklərdə yalnız soyuqdəymələrə səbəb olduğu halda, körpələrdə ciddi xəstəliklərə səbəb ola bilər. Virus yalnız körpənin gözlərinə, ağzına və ya dərisinə təsir edərsə, antiviral müalicə ilə sağalma əldə edilə bilər. Lakin infeksiya sistematik hala gələrsə və orqanlara təsir edərsə, ölümcül ola bilər. Xüsusilə həyatın ilk dörd həftəsində körpələr herpes virusuna çox həssasdırlar.
Körpələr B qrupu streptokok (GBS) kimi hüceyrədaxili bakteriyalara da həssasdırlar. GBS valideynlərin həzm və ya cinsiyyət sistemlərində zərərsiz olaraq tapılsa da, körpələrdə sepsis, pnevmoniya və meningitə səbəb ola bilər. Eynilə, böyüklər üçün zərərsiz olan bəzi E.Coli ştammları körpələrdə ciddi infeksiyalara səbəb ola bilər.
Yeni doğulmuş uşağın valideynləri ziyarətçiləri öpmək və toxunmaq barədə xəbərdar etməkdən çəkinməməlidirlər. Körpənin sağlamlığı ilə həqiqətən maraqlanan bir ziyarətçi bu cür istəklərlə narahat olmamalıdır.
Körpəni öpmək məcburiyyətindəsinizsə, infeksiya riskini minimuma endirmək üçün aşağıdakılara diqqət etməlisiniz:
Əllərinizi yaxşıca yumağınızdan əmin olun.
Körpənin üzünü və ya ağzını öpməkdən çəkinin, bunun əvəzinə onun ayaqlarını və ya başının arxasını öpə bilərsiniz.
Aktiv infeksiyanız varsa, körpəni ziyarət etməkdən çəkinin. Bu, körpə bir aydan az olduqda xüsusilə vacibdir.
Soyuqdəymə kimi tənəffüs yolu infeksiyalarınız varsa, maska taxaraq yaxınlaşa bilərsiniz.
Herpes virusunun səbəb olduğu lezyonlarınız varsa, məsələn, soyuqdəymə kimi, onları sarğı ilə örtməlisiniz.
Unutmaq olmaz ki, yeni doğulmuş körpələr infeksiyalara qarşı kifayət qədər həssasdırlar. Körpələri öpmək sevgi əlamətidir, lakin bu sevgi bəzən onların ağır xəstələnməsinə səbəb ola bilər.
Mənbə: Science Alert
